Ministériu Justisa no Defensoria Públika organiza Semináriu Internasionál
Ministériu Justisa no Defensoria Públika organiza semináriu Internasionál ida ho tema “Defensoria Públika iha Estadu Direitu Demokrátiku: observasaun interkulturál ida kona-ba direitu atu hetan asesu ba justisa iha Timor-Leste”. Eventu ne’e hala’o durante loron 15 no 16 fulan-marsu, iha auditóriu Ministériu Justisa nian.
Iha diskursu maklokek eventu ne’e nian, Ministra Justisa, Maria Ângela Carrascalão, ko’alia klaru kona-ba “serbisu la hatene kolen ne’ebé Defensoria Públika Timor nian hala’o, ho profisionalizmu no sentidu servisu públiku nian ne’ebé boot, tuir programa asesu ba justisa no kumpre ninia misaun konstitusionál no legál atu defende sira ne’ebé vunerável liu”.
Ministra Justisa hato’o agradesimentu ba Kooperasaun Brazíl nian ba “serbisu ne’ebé ema hotu rekoñese iha ámbitu Defensoria Públika nian, iha ne’ebé nasaun ne’e sai hanesan parseiru prinsipál no fundamentál ba fortalesimentu institusionál Timor-Leste nian”.
Maria Ângela Carrascalão, afirma tán katak ”Defensoria Públika Timor nian serbisu atu asegura asesu ida ne’ebé hanesan ba justisa ba ema hotu-hotu”, hodi hatutan katak “Estadu hala’o tuir ninia kompromisu atu garante ba sidadaun hotu-hotu valorizasaun ba sira-nia direitu sira iha tribunál, ho asesu ba akonsellamentu jurídiku, atu nune’e sidadaun hotu-hotu hatene ninia direitu sira no ida-ne’e la depende se sira osan ka lae”.
Ministra Justisa hakotu ninia intervensaun hodi apela atu “timoroan hotu-hotu haree ba Defensoria Públika hanesan instituisaun ida ne’ebé nakloke, disponivel no sempre atu serbí sira”.
Durante eventu ne’e, espesialista timoroan no internasionál sira debate kona-ba “Kooperasaun Internasionál iha Timor-Leste, hafoin tinan 16”, “Formasaun atór sira Sistema Justisa nian iha Sentru Formasaun Jurídika: susesu no vulnerabilidade sira”, “Interasaun sira entre formál no tradisionál: posibilidade sira atu halo reforma iha lejizlasaun kona-ba família”, no ikusliu maka tema “Entre tradisionál no formál: Espesifisidade kulturál sira Timor-Leste nian no posibilidade sira ba atuasaun husi Defensoria Públika”.
Organizasaun semináriu ida-ne’e nian hetan tulun husi Ajénsia Kooperasaun Brazíl nian (ABC, sigla iha lian portugés), Ajénsia Kooperasaun Internasionál Koreia nian (KOICA, sigla iha lian inglés), Ajénsia Kooperasaun Internasionál Japaun nian (JICA, sigla iha lian inglés) no Programa Nasoins Undidas nian ba Dezenvolvimentu (PNUD, sigla iha lian portugés).
Semináriu internasionál ne’e hetan mós partisipasaun husi Enbaixadór Brazíl nian, Aldemo Garcia, Prezidente Tribunál Rekursu, Deolindo dos Santos, Defensór Públiku Jerál, Sergio Hornai, Juis, defensór públiku, advogadu, parseiru dezenvolvimentu, akadémiku no autoridade lokál sira.
