Governu hala’o diálogu ho komunidade sira husi munisípiu Manufahi no Ainaru

Ses. 09 marsu 2018, 09:53h
6W9A7971

Iha loron 8 no 9 fulan-marsu, Primeiru-Ministru, Marí Alkatiri, akompaña husi membru Governu Konstitusionál VII nian balu hala’o diálogu ida ho komunidade Same nian iha munisípiu Manufahi no Maubisi nian iha munisípiu Ainaru.

Durante hala’o diálogu ho komunidade, membru Governu sira, ne’ebé lidera husi Primeiru-Ministru, iha oportunidade hodi esplika ba komunidade sira kona-ba situasaun polítika no ekonómika atuál país nian, nune’e mós kona-ba área prioritáriu haat ne’ebé hatuur ona iha Programa Governu Konstitusionál VII nian (sosiál, dezenvolvimentu infraestrutura nian, dezenvolvimentu ekonómiku no modernizasaun institusionál). 

Membru Governu sira ne’e, ne’ebé akompaña husi Prezidente Autoridade Munisipál no Administratór Postu munisípiu Ainaru no Manufahi nian, rona preokupasaun no aspirasaun husi populasaun kona-ba futuru sira-nia munisípiu no país nian liuhusi reprezentante sira husi konfisaun relijioza sira, reprezentante sira husi organizasaun feto sira nian, foin-sa’e nian no veteranu sira nian, organizasaun la’ós governamentál, emprezáriu no lider komunitáriu sira.

Iha ninia intervensaun, Marí Alkatiri esplika ba populasaun katak “lider nasionál sira presiza iha konsensu entre sira atu nune’e bele diskute asuntu ida ho importánsia nasionál hanesan kestaun kona-ba posu minarai Greater Sunrise”.

Xefe Governu ne’e mós hateten klaru liután katak karik laiha konsensu entre lider sira sei sai susar atu hetan forsa ne’ebé  presiza, hodi hasoru kompañia esplorasaun minarai nian no Austrália, hodibele garante katak kadoras minarai nian dada mai Timor-Leste.

Molok hala’o diálogu iha Same, Marí Alkatiri, akompaña husi Vise-Ministru Edukasaun, José Neves para hodi kumprimenta labarik sira husi eskola lokál ida ne’ebé simu na’i-ulun ne’e ho haksolok no nia hateten ba alunu foin-sa’e sira “estuda no aprende atu dezenvolve nasaun Timor tanba futuru Timor-Leste nian iha imi-nia liman”.

Marí Alkatiri hala’o mós inspesaun ba obra sira estrada nian iha zona flexa entre munisípiu Ainaru no munisípiu Manufahi, atu hatene diretamente kompañia ne’ebé responsavel ba prosesu obra sira ne’e nian, no esplika intensaun kona-ba inspesaun ne’e katak “tanba ita hatene katak iha zona sentrál país nian seidauk iha konsisténsia iha obra sira ne’ebé hala’o ona tanba ne’e bainhira udan hamosu nafatin problema. Entaun ita tenke halo estudu kona-ba rai ne’e atu nune’e bainhira udan mai labele sobu tan estrada”.

Akompaña Primeiru-Ministru iha atividade sira ne’e maka Ministru Estadu no Konselleiru ba Seguransa Nasionál, José Ramos-Horta, Ministru Estadu no Ministru Agrikultura no Peskas, Estanislau da Silva, Ministru Estadu no Ministru Rekursus Minerais, Mariano Assanami Sabino, Ministru iha Prezidénsia Konsellu Ministrus, Adriano do Nascimento, Ministru Turizmu, Manuel Vong, Vise-Ministru Dezenvolvimentu Obras Públikas, Mariano Renato da Cruz, Vise-Ministru Dezenvolvimentu Abitasaun, Ordenamentu no Ambiente, Abrão Santos Oliveira, Vise-Ministru Justisa, Sebastião Ximenes, Vise-Ministru Edukasaun no Kultura, José Neves, Sekretáriu Estadu Konsellu Ministrus no Komunikasaun Sosiál, Matias Freitas Boavida, no Sekretária Estadu Igualdade Jéneru no Inkluzaun Sosiál, Laura Menezes Lopes.

   Ba leten