Governu Timor-Leste

Iha tersa, loron 6 fulan-marsu, oradór nasionál no internasionál sira sei halo debate kona-ba organizasaun no jestaun justisa kriminál nian, iha konferénsia internasionál ida ne’ebé sei hala’o iha Otél Novo Turismo, iha Dili.

Konferénsia ida-ne’e hanesan inisiativa ida ne’ebé hetan apoia husi Uniaun Europeia no Camões – Instituto da Cooperação e da Língua, I.P. iha ámbitu Projetu Apoiu ba konsolidasaun Estadu Direitu iha PALOP no Timor-Leste (PACED, sigla iha lian portugés), iha parseria ho Tribunál Rekursu Timor-Leste.

Iha eventu ne’e, partisipante sira sei debate kona-ba dezafiu ne’ebé órgaun polísia kriminál no tribunál sira enfrenta iha kreximentu husi kriminalidade organizada ho karatér ekonómiku-finanseiru.

Haree ba nesesidade atu hetan resposta ne’ebé lais, efikáz, konsertada no ekonomikamente sustentavel kona-ba oinsá investiga no julga krime sira, debate ne’e sei haree liu kona-ba reforsu husi mekanizmu no estrutura governasaun nian sira, organizasaun no jestaun justisa kriminál, hahú kedas iha nivel aas liu husi estratéjia Governu no polítika públika nian, to’o ba knaar investigatória, probatória no jurisdisionál sira rasik.

Konferénsia internasionál ne’e sei konta mós ho partisipasaun husi Jorge Graça, jurista no antigu prezidente Komisaun Reforma Lejizlativa no Setór Justisa nian ne’ebé maka oras ne’e ne’e la eziste ona iha (Timor-Leste), José Lopes da Mota, juis konselleiru Supremu Tribunál Justisa (Portugál), Marcelo Piragibe, diretór Eskola Nasionál Majistratura (Brazíl), João Carlos Trindade, juis konselleiru Tribunál Supremu (Mosambike) no Conçeição Gomes, koordenadora observatóriu permanente justisa Portugál nian.

PACED maka sai nu’udar parseria ida entre Uniaun Europeia ho PALOP no Timor-Leste, no ninia objetivu sira mak afirmasaun no konsolidasaun Estadu direitu iha nasaun sira ne’e, nune’e mós prevensaun no luta hasoru korrupsaun, krime fase-osan no kriminalidade organizada no, liuliu, tráfiku droga.

Iha Timor-Leste, aleinde ho Tribunál Rekursu, PACED hala’o serbisu diretamente ho Ministériu Justisa, Prokuradoria-Jerál Repúblika, Polísia Sientífika Investigasaun Kriminál no Unidade Informasaun Finanseira.