Primeiru-Ministru, Marí Alkatiri, hala’o lansamentu ba programa kona-ba prezervasaun memória pasadu nian liuhusi peskiza no mapeamentu ba fatin istóriku sira iha Sentru Nasionál Chega! (CNC, sigla iha lian portugés) iha segunda, loron 5 fulan-fevereiru.

Hugo Fernandes, Diretór CNC nian, hatete katak fatin istóriku besik 58 iha Dili maka identifika ona, hodi esplika katak “fatin sira ne’e hetan eskolla tanba iha signifikadu istóriku durante períodu luta ba libertasaun nasionál”.

Diretór CNC nian ne’e hatete mós katak “presiza duni atu aprova kuadru legál hodi prezerva fatin istóriku sira nune’e bele kria regra sira ba ninia reabilitasaun no restauru”.

Ko’alia ba audiénsia, Primeiru-Ministru, Marí Alkatiri, deklara katak “memória labele rai metin de’it iha gaveta, memória ne’e halo parte ba ita-nia istória no labele mate, tenke hatutan husi jerasaun ba jerasaun”. Primeiru-Ministru hatutan mós katak “presiza duni kria inisiativa sira ne’ebé bele envolve jerasaun foun”, no tanba ne’e “istória kona-ba luta ba libertasaun nasionál nian tenke hatama iha kurríkulu eskolár nasionál sira”.

Diretór CNC nian fó-sai katak iha ona nota entendimentu ida ne’ebé asina ho Ministériu Edukasaun no Kultura ho objetivu atu tau materiál sira husi Sentru Nasionál Chega! iha kurríkulu Timor nian, ho Ministériu Turizmu hodi halo mapeamentu kona-ba fatin istóriku sira no ho Ministériu Justisa kona-ba elaborasaun diploma lejizlativu ne’ebé bele regula protesaun ba fatin istóriku sira.

Primeiru-Ministru konklui ninia intervensaun hodi afirma katak “Timor sei bele sai poténsia ida ba turizmu istóriku no kulturál”.

Eventu ne’e konta mós ho partisipasaun husi Ministra Justisa, Maria Ângela Carrascalão, no Ministru Turizmu, Manuel Vong.