Sorumutuk Estraordináriu Konsellu Ministrus nian iha loron 25 fulan-janeiru tinan 2018

Prezidénsia Konsellu Ministrus

VII Governu Konstitusionál

...........................................................................................................................

Komunikadu Imprensa

Sorumutuk Estraordináriu Konsellu Ministrus nian iha loron 25 fulan-janeiru tinan 2018

Governu halibur-malu iha Palásiu Governu, iha Dili, hodi hala’o sorumutuk estraordináriu Konsellu-Ministrus nian no aprova ona, ho alterasaun balu, proposta kona-ba Dekretu-Lei ne’ebé estabelese Estatutu Orgániku Konsellu Kombatente Libertasaun Nasionál sira nian, ne’ebé aprezenta husi Sekretáriu Estadu ba Veteranu sira, André da Costa Belo (L4). Diploma ne’e buka atu define estrutura, objetivu no kompeténsia sira husi órgaun konsulta Governu nian ne’e, ne’ebé trata asuntu hirak ne’ebé relasiona ho defeza ba interese veteranu sira nian no ninterese sira seluk ne’ebé liga ba Kombatente Libertasaun Nasionál sira, tuir Estatutu Kombatente Libertasaun Nasionál sira nian ne’ebé vigora hahú kedas husi tinan 2011.

Konsellu Ministrus aprova ona Rezolusaun ne’ebé aprezenta husi Sekretáriu Estadu Konsellu Ministrus no Komunikasaun Sosiál, Matias Boavida, ne’ebé nomeia Gil da Costa hanesan Prezidente Konsellu Administrasaun Rádio e Televisão de Timor-Leste, Empreza Pública (RTTL, E.P.), hodi subtitui Prezidente ida agora ne’e, Milena Soares Abrantes, ne’ebé nia funsaun sei remata iha loron 28 fulan-janeiru tinan 2018, hafoin mandatu iha períodu ida ho durasaun tinan haat.

Ikusmai, aprova ona mós proposta kona-ba alterasaun ba Dekretu-Lei n. 3/2015, loron 14 fulan-janeiru nian, no ba Dekretu-Lei n. 4/2015, loron 14 fulan-janeiru nian, ne’ebé aprova Kurríkulu sira husi Edukasaun Pré-Eskolár, husi Siklu Dahuluk no Daruak Ensinu Báziku nian, ne’ebé aprezenta husi Ministru Edukasaun no Kultura, Fernando Hanjam, no husi Vise-Ministra Edukasaun no Kultura, Lurdes Maria Bessa. Alterasaun hirak ne’ebé propoin ne’e buka atu, tuir Konstituisaun no tuir Lei Baze Edukasaun nian ne’ebé vigora ona: afirma fila-fali ho klaru lian ofisiál sira Timor-Leste nian hanesan Lian ba Sistema Edukativu Nasionál no Patrimóniu Kulturál Nasionál; atu halo alterasaun ba númeru oras (karga orária) ba Ensinu Pré-Eskolár; no halo distribuisaun fila-fali númeru oras nian (karga oráriu) ne’ebé destina ba dezenvolvimentu Lian Tetun no Lian Portugés nian, no ida ikus ne’e maka asume papél lian instrusaun ne’ebé boot liu. REMATA

   Ba leten