Sorumutuk Konsellu Ministrus nian iha loron 17 fulan-janeiru tinan 2018
Prezidénsia Konsellu Ministrus
VII Governu Konstitusionál
..............................................................................................................................
Komunikadu Imprensa
Sorumutuk Konsellu Ministrus nian iha loron 17 fulan-janeiru tinan 2018
Governu hala’o sorumutuk iha Palásiu Governu, iha Dili, no analiza Dekretu Governu kona-ba Regulamentu ba Prosedimentu Investimentu Privadu nian, ne’ebé aprezenta husi Primeiru-Ministru, Mari Alkatiri, no husi Ajénsia ba Promosaun Investimentu no Esportasaun Timor-Leste,I.P., ne’ebé hanaran TradeInvest. Regulamentu ida ne’e prevee rejime foun ba prosedimentu investimentu privadu nian tuir vigora iha Lei foun Investimentu Privadu, ne’ebé aprova liuhusi Lei n.15/2017, loron 23 fulan-agostu, atu simplifika no desburokratiza regra sira ba investimentu esternu no nasionál nian atu nune’e bele promove atrasaun ba investimentu privadu, no armoniza lejizlasaun nasionál ho prátika internasionál ne’ebé maka di’ak liu tuir prevee ona iha Akordu Globál Investimentu Asosiasaun nian husi Nasaun Sudeste Aziátiku. Regulamentu ida ne’e nia objetivu atu estabelese konjuntu regra no prosedimentu sira ba atribuisaun benefísiu no sertifikasaun ba investidór nasionál no internasionál sira, hodi aprova regulamentasaun komplementár ne’ebé presiza ba implementasaun Lei foun husi Investimentu Privadu. Dekretu-Lei ne’e hetan ona aprovasaun, hafoin halo tiha korresaun balu.
Haree katak investimentu iha rekursu naturál sira importante tebtebes ba dezenvolvimentu Timor-Leste nian, liuliu kona-ba esplorasaun depózitu manganéziu, Ministru Estadu no Ministru Rekursus Minerais, Mariano Assanami Sabino, aprezenta Rezolusaun Governu nian kona-ba Regra Espesífika sira Lisensiamentu Atividade Esplorasaun Mineira atu halo peskiza, rekolla no halo teste ba amostra sira manganéziu nian iha Rejiaun Administrativa Espesiál Oekusi Ambenu, buka atu hetan ekilíbriu ida entre salvaguarda interese nasionál iha utilizasaun rekursus naturál sira no atu proteje konfiansa husi investidór sira ne’ebé hala’o knaar iha esplorasaun ba rekursu hirak ne’e. Rezolusaun Governu nian ne’e aprova ona.
Konsellu Ministrus aprova mós proposta ne’ebé hato’o husi Ministru Planu no Finansas, Rui Augusto Gomes, atu fó subsídiu komplementar no/ka oras estra ba funsionáriu sira Ministériu Planu no Finansas nian durante taka konta Tinan Fiskál 2017.
Ikusliu, aprova mós pedidu sira husi Banku Dezenvolvimentu Aziátiku (ADB, sigla iha lian inglés) ne’ebé hato’o husi Ministru Planu no Finansas, ba asinatura karta garantia efetivasaun nian ba direitu, priviléjiu, imunidade no izensaun sira husi ADB relasiona ba ninia operasaun hirak ne’ebé laós soberana, no mós ba asinatura karta naun-objesaun Governu nian ba selebrasaun empréstimu husi ADB ba sosiedade Singapura nian Olam Internasionál Limited ba ezekusaun projetu ‘Agrikulturál Value Chain Development’ no ba asisténsia téknika asosiada ne’ebé abranje país oioin iha Sudeste Aziátiku, inklui Timor-Leste. FIN
