Sorumutuk Konsellu Ministrus nian iha loron 10 fulan-janeiru tinan 2018

Prezidénsia Konsellu Ministrus

VII Governu Konstitusionál

………………………………………………………………………………………………………………

Komunikadu Imprensa

Sorumutuk Konsellu Ministrus nian iha loron 10 fulan-janeiru tinan 2018

Governu hala’o sorumutuk iha Palásiu Governu, iha Dili, no aprova ona, hafoin halo korresaun balu, ba proposta Dekretu-Governu nian kona-ba ezekusaun orsamentál iha rejime duodesimál, ne’ebé maka regula Lei Orsamentu no Jestaun Finanseiru ne’ebé vigora hela, ne’ebé aprezenta husi Ministru Planu no Finansas, Rui Augusto Gomes. Dekretu Governu nian ne’e maka sei determina rejime ezekusaun orsamentál tanba Orsamentu Jerál Estadu ba tinan 2018 la tama iha vigór iha inísiu tinan finanseiru nian, loron 1 fulan-janeiru tinan 2018. Molok Orsamentu Jerál Estadu nian ba tinan 2018 tama iha vigór, sei prorroga nafatin vijénsia husi dispozisaun hirak ne’ebé hakerek iha Dekretu Governu nian ne’e kona-ba ezekusaun orsamentál ba tinan 2017, ho adaptasaun hirak ne’ebé presiza ba estrutura orgánika Governu Konstitusionál VII daudaun ne’e nian.

Ministru Planu no Finansas fó-sai ona mós katak iha semana ida-ne’e nia laran, sei hala’o workshop ida iha ne’ebé sei partisipa husi diretór Finansas nian hotu-hotu, husi Ministériu sira Governu atuál nian ho objetivu atu klarifika rejime ezekusaun orsamentál duodesimál.

Ikusliu, diskute mós iha Konsellu-Ministrus proposta kona-ba Dekretu-Lei ne’ebé estabelese Estatutu Orgániku Konsellu Kombatentes Libertasaun Nasionál nian, ne’ebé aprezenta husi Ministra Solidariedade Sosiál, Florentina Smith. Diploma ne’e buka atu define estrutura, objetivu no kompeténsia sira husi órgaun konsulta Governu nian ida-ne’e ba asuntu hirak ne’ebé relasiona ho defeza ba interese veteranu sira nian no asuntu sira seluk ne’ebé ko’alia kona-ba Kombatente Libertasaun Nasionál, tuir Estatutu Kombatente Libertasaun Nasionál ne’ebé tama iha vigór hahú kedas iha tinan 2011. Maibé, molok halo aprovasaun ne’e, konsidera importante tebes atu halo alterasaun ki’ik balu ho hanoin atu viabiliza promulgasaun husi Prezidente Repúblika. REMATA

url: http://timor-leste.gov.tl?lang=tp&p=19221