Tribunál Arbitrajen ICSID nian konfirma katak laiha kompeténsia hodi deside asaun ne’ebé aprezenta husi Lighthouse kontra Timor-Leste: deklara katak arbitajen ne’e taka ona

Dili, loron 28 fulan-dezembru tinan 2017

Tribunál Arbitrajen ICSID nian konfirma katak laiha kompeténsia hodi deside asaun ne’ebé aprezenta husi Lighthouse kontra Timor-Leste: deklara katak arbitajen ne’e taka ona.

Iha loron 22 fulan-dezembru tinan 2017, tribunál arbitrajen ida ne’ebé harii ho patrosíniu husi Sentru Internasionál Rezolusaun Diferendu Kona-ba Investimentu (“ICSID” sigla iha lian inglés”] fó-sai desizaun kona-ba jurizdisaun ne’ebé afavór ba Repúblika Demokrátika Timor-Leste (Timor-Leste). Prosedimentu arbitrajen nian ne’e ko’alia kona-ba alegasaun kontra Timor-Leste ne’ebé aprezenta husi empreza australiana ida, Lighthouse Corporation Pty Ltd, no husi empreza ida husi Illa Seychelles, Lighthouse Corporation Pty Ltd IBC (hamutuk bolu ho naran Lighthouse). Timor-Leste sempre defende ninia pozisaun katak ICSID laiha kompeténsia hodi rona no foti desizaun kona-ba disputa ne’e. Tribunál Arbitrajen (Tribunál) konklui katak (i) laiha kompeténsia kona-ba disputa ida ne’e; (ii) Lighthouse tenke suporta totalidade husi kustu arbitrajen nian; (iii) Lighthouse tenke selu USD 1.300.000 hanesan taxa legál Timor-Leste nian no (iv) pedidu sira seluk hetan rejeisaun.

Nu’udar kontinuasaun husi konkluzaun hirak ne’e, Tribunál deklara ona katak prosesu ne’e taka ona bazeia ba n.1 husi Artigu da-38 Regulamentu Arbitrajen ICSID nian.

________________
   Ba leten