Governu Timor-Leste

Primeiru-Ministru, Marí Alkatiri, vizita Sekretáriu Estadu ba Veteranu sira, André da Costa Belo, ne’ebé koñesidu hahú kedas iha ninia partisipasaun iha Rezisténsia ho naran L4, oras balu molok lori ba Singapura, hodi simu tratamentu urjente.

Vizita ne’e hala’o iha loron 22 fulan-novembru, iha ospitál Nasionál Guido Valadares, iha ne’ebé Sekretáriu Estadu baixa bá hodi halo tratamentu ba komplikasaun sira moras krónika ida nian, ne’ebé agrava iha semana ikus ne’e no moras ida-ne’e seidauk iha tratamentu iha país ne’e.

Tuir Lei Sistema Saúde nian, Estadu bele husu “asisténsia médiku iha rai-li’ur iha kazu exesionál sira, bainhira laiha tan ona dalan seluk atu halo tratamentu iha rai laran no hodi halo tuir ho rigór limite sira husi disponibilidade orsamentál”. Nesesidade tratamentu ne’e nian iha karáter exesionál ne’ebé prevee ona iha lei no mosu iha situasaun ida, ne’ebé mak exesionál mós, falta verba, tanba demora iha aprovasaun ba Orsamentu Retifikativu nian, ne’ebé Governu haruka ba Parlamentu Nasionál iha loron 9 fulan-novembru, ho pedidu apresiasaun urjente. Kazu konkretu ida-ne’e, ikusmai, rezolve liuhusi utilizasaun extraordinária fundu sira Ministériu Solidariedade Sosiál nian ba Veteranu sira, envezde pagamentu normál liuhusi osan ne’ebé fó ba Ministériu Saúde. Atu fó hanoin fila fali katak Governu Konstitusionál VII simu ona pose iha loron 15 fulan-setembru no sei jere de’it verba sira ne’ebé sei iha husi orsamentu ne’ebé define ona ba Governu anteriór.

Iha vizita ba Sekretáriu Estadu ne’e, Primeiru-Ministru hateten katak “kazu umanitáriu ida-ne’e sai hanesan de’it evidénsia ida katak Orsamentu Estadu nian la’ós abstrasaun ida, la’ós osan sira ne’ebé atu serve instituisaun sira iha polítika ideolójika sira. Ne’e osan sidadaun sira nian, atu aplika iha rezolusaun problema sira loroloron nian: saúde, edukasaun, seguransa, moris-di’ak nian”. Primeiru-Ministru garante katak “Governu sei kontinua halo buat hotu ne’ebé bele halohodi rezolve situasaun sira ne’ebé difikuldade polítiku iha Parlamentu provoka to’o oras ne’e, ho konsekuénsia sira ne’ebé grave liután no afeta diretamente ba moris timoroan sira nian”.

Iha dezlokasaun ba  ospitál Nasionál Guido Valadares ne’e, Primeiru-Ministru vizita mós Padre João de Deus, ne’ebé, maski ema portugés, moris iha Timor-Leste durante tinan 50 liu ona. Iha tinan 2012, nia simu Medalla Orden Don Martinho Lopes nian, ne’ebé kria atu “rekoñese no distinge membru sira kleru nian ne’ebé, la haree tuir sira-nia nasionalidade, bele fó ona kontributu relevante ba luta independénsia nasionál nian no tanba ne’e bele sai hanesan  meresedór sira ba títulu Apoiante Luta Libertasaun Nasionál nian”.