TPA atualiza informasaun kona-ba prosesu Konsiliasaun entre Timor-Leste no Austrália

Kin. 23 novembru 2017, 17:23h
FotoCdI_PG

Tribunál Permanente Arbitrajen (TPA) fó-sai nota imprensa ida, hafoin sorumutuk foin lalais ne’e kona-ba ketan tasik, iha Singapura. Delegasaun sira husi Timor-Leste no husi Austrália hala’o sorumutuk ho Komisaun Konsiliasaun no mós ho Joint Venture Greater Sunrise nian, iha loron 18 fulan-novembru, atu kontinua halo negosiasaun kona-ba tratadu ketan tasik no konseitu dezenvolvimentu nian ba kampu gás Greater Sunrise.

Timor-Leste no Austrália hetan ona akordu ida iha loron 30 fulan-agostu, no elabora ona ezbosu husi tratadu ida ne’ebé delimita ketan tasik sira entre nasaun rua ne’e, ko’alia kona-ba estatutu jurídiku no estabele rejime espesiál ida ba kampu gás Greater Sunrise nian. Define mós dalan ba dezenvolvimentu rekursu no fahe reseita sira tuir rezultadu ne’e.

Komisaun ne’e sei konvoka sorumutuk foun ida ho parte hotu-hotu, iha fulan-dezembru, atu revee progresu husi debate kona-ba konseitu dezenvolvimentu Greater Sunrise nian.

Atu hetan asesu ba nota imprensa husi Tribunál Permanente Arbitrajen nian, hanehan iha ne’e.

Atu haree notísia kona-ba akordu entre Timor-Leste no Austrália kona-ba testu husi tratadu kona-ba ketan tasik, hanehan iha ne’e.

   Ba leten