………………………………………………………………………………………………………………
Komunikadu Imprensa
Sorumutuk Konsellu Ministrus loron 22 fulan-novembru tinan 2017
Governu hala’o sorumutuk iha Palásiu Governu, iha Dili, no aprova ona alterasaun daruak ba Estatutu Karreira Dosente Universitária, atubele distribuin subsídiu ida ne’ebé fó ba kategoria ida-idak ho loloos, tuir ninia ierarkia. Estatutu ne’e aprova ona iha tinan 2012 (Dekretu-Lei n.u 7/2012, loron 15 fulan-fevereiru) ne’ebé define grupu benefisiáriu sira no valór másimu subsídiu nian atu fó ba grupu ida-idak. Liu tiha tinan tolu, Dekretu Governu n.u 2/2015, loron 14 fulan-janeiru, maka regula ona kondisaun no valór sira ne’ebé aplika-belek (aplicável) ba kategoria karreira dosente universitária ida-idak, maibé ezije grau Doutór ba ninia atribuisaun. Alterasaun ida ne’ebé aprova daudaun ne’e atu kumpri duni objetivu prinsipál subsídiu nian, mak atu promove kualidade ba profesór universitáriu sira-nia hanorin, liuhusi apoiu ba peskiza no investigasaun, hodi haluan asesu ba subsídiu ba kategória sira ne’ebé maka la’os doutoradu, tanba sei iha profesór sira ho grau akadémiku hanesan ne’e sei menus.
Konsellu Ministrus analiza ona Rejime Promosaun Pesoál kona-ba Karreira sira Administrasaun Públika, atu regula promosaun funsionáriu públiku sira nian.
Diploma rua ne’e propoin husi Primeiru-Ministru no husi Komisaun Funsaun Públika.
Konsellu Ministrus analiza ona mós prosesu fiskalizasaun husi Ministériu Agrikultura no Peskas ba embarkasaun sira husi sosiedade komersiál Hong Long Fisheries, Lda, kestaun ne’ebé importante tebes ba ekonomia nasionál. Ho espíritu kooperasaun institusionál, Governu deside ona, atu informa ba Prokuradór-Jerál Repúblika kona-ba dilijénsia sira ne’ebé foti ona, no sira ne’ebé maka sei foti iha prosesu ne’e. REMATA