Primeiru-Ministru desloka ba Perth Austrália Osidental hodi partisipa iha Konferénsia Rejional Ázia Pasífiku
Primeiru-Ministru
VII Governu Konstitusionál
..............................................................................................................................
Dili, loron 1 fulan-novembru tinan 2017
Primeiru-Ministru desloka ba Perth Austrália Osidental hodi partisipa iha Konferénsia Rejional Ázia Pasífiku
Primeiru-Ministru, Marí Alkatiri, ohin hala’o vizita traballu ba Perth, Austrália, hodi partisipa iha Konferénsia Rejional Ázia Pasifiku, entre loron 2 to’o loron 4, ne’ebé halibur investidores importante tebes iha Austrália, Rejiaun Pasífiku no mundu tomak. Vizita ida ne’e responde ba konvite ofisial Ministru Finansas Austrália nian, Senador Mathias Cormann.
Primeiru-Ministru Timor-Leste hanesan mós Primeiru-Ministru Austrália, Malcolm Turnbull, Prezidente Repúblika Federal Alemaña, Frank Steinmeier, no Ministru Finansas Austrália, sei sai hanesan orador prinsipal iha abertura konferénsia ida ne’e.
Primeiru-Ministru sei hato’o diskursu kona-ba potensialidade de investimentu iha Timor-Leste iha Setor Gás, Petróleu, Turismu no Agrikultura. “Hau nia partisipasaun iha konferénsia ne’e hatudu konfiansa ba Governu Konstitusionál VII ne’ebé foin simu posse no mós hatudu importánsia Timor-Leste iha rejiaun”, dehan Primeiro-Ministru, Marí Alkatiri.
Iha konferénsia ida ne’e, Primeiru-Ministru mós sei hala’o enkontru bilateral ho Prezidente Alemaña, Primeiru-Ministru Austrália, Ministru Finansas Austrália, Ministru Negósiu Estranjeiru Singapura, Prezidente Woodside Petróleo, Prezidente Conoco Phillips, no seluk tan. Primeiru-Ministru mós sei hala’o vizita ba Henderson Naval Base Headquarters hodi hare ró ba patrullamentu ne’ebe Austrália hakarak oferese mai Timor-Leste. “Importante tebes ba Timor-Leste explora posibilidade hotu-hotu atu bele defende nia rekursus no mós nia soberania nasional”, hateten Primeiru-Ministru.
Iha vizita ida ne’e, Primeiru-Ministru, Marí Alkatiri, akompaña husi Ministru Estadu no Ministru Agrikultura no Peskas, Estanislau da Silva, Ministru-Adjuntu ba Primeiru-Ministru Delimitasaun Fronteiras, Agio Pereira, no Embaixador Timor-Leste ba Austrália, Abel Guterres, no Xefi Gabinete ba Primeiru-Ministru, Nelson Santos. Delegasaun Primeiru-Ministru nian kiik tebes kompara ho prátika anterior.
Primeiru-Ministru no Delegasaun sei fila hikas mai Timor-Leste iha loron 6 fulan-novembru 2017, segunda-feira. Remata
