Governu prepara atu aprezenta fila-fali Programa ba Parlamentu Nasionál, iha respeitu ba demokrasia no estabilidade
Primeiru-Ministru
VII Governu Konstitusionál
..............................................................................................................................
Dili, loron 20 fulan-outubru tinan 2017
Governu prepara atu aprezenta fila-fali Programa ba Parlamentu Nasionál, iha respeitu ba demokrasia no estabilidade
Governu Konstitusionál VII sei restrutura hela Programa atu aprezenta ba Parlamentu Nasionál, liuhusi sujestaun deputadu sira nian, hafoin opozisaun sira hato’o rejeisaun, kona-ba Programa ne’ebé aprezenta tiha iha loron 16 fulan-outubru. Primeiru-Ministru, Marí Alkatiri, garante katak, ho forma ne’e nia sei halo buat hotu atu foti Nasaun ba iha situasaun dezenvolvimentu nian ne’ebé líder istóriku sira promete tiha ona iha tempu susar luta nian.
Ho Programa foun ne’e, ne’ebé sei aprezenta dala ida de’it ho Orsamentu Retefikativu to’o iha tinan ne’e nia rohan, dala ida tan, Governu garante katak, sei halo buat hotu-hotu atu fó ba Povu futuru ida ne’ebé dignu liu, “Timor-Leste ne’ebé mak inkluzivu, justu no prósperu liután”.
Maski haree tiha situasaun ne’ebé horisehik hatudu iha Parlamentu, populasaun hatudu ninia maturidade, hodi mantein nafatin iha hakmatek no pas, Governu kaer metin ba ninia kompromisu hodi jere Ezekutivu tuir Konstituisaun Repúblika nian.
Aprovasaun ba mosaun rejeisaun nian ba Programa, husi bankada tolu opozisaun nian iha Parlamentu Nasionál, maka sai hanesan momentu kreximentu nian ida tan iha nasaun joven ne’e, ne’ebé maka haka’as an atu respeita ba valór fundamentál sira demokrasia no pluralizmu nian ne’ebé maka Governu simu ho laran moos. Pozisaun ida ne’e folin boot tebes ba Timor-Leste iha rekoñesimento internasionál no, ida ne’ebé maka depende ba Governu, sei mantein nafatin. Remata
