Programa Governu Konstitusionál VII nian aprezenta ona iha Parlamentu Nasionál
Programa Governu Konstitusionál VII nian aprezenta ona husi Primeiru-Ministru, Marí Alkatiri, ba Parlamentu Nasionál, iha loron 16 fulan-outubru.
Dokumentu ne’e entrega ona ba Prezidente Parlamentu nian, iha loron 10 fulan-outubru, maizoumenus semana tolu hafoin Governu simu pose.
Hetan aprovasaun husi Ezekutivu iha sorumutuk Konsellu Ministrus nian, iha loron 6 fulan-outubru, Programa ne’e hatán ba “prosesu konstrusaun Timor-Leste ida ne’ebé inkluzivu, justu no prόsperu liután, ho biban ne’ebé hanesan ba ema hotu”, nu’udar define ona iha Planu Dezenvolvimentu Estratéjiku, no ne’ebé halo tuir Objetivu sira husi Dezenvolvimentu Sustentavel.
Dokumentu ho pájina 51 ne’e, ne’ebé espresa kompromisu Governu Konstitusioná VII nian ba governasaun tinan lima oinmai, sei debate iha Parlamentu, to’o semana ne’e nia rohan, loron 20 fulan-outubru.
