………………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 10 fulan-outubru tinan 2017
Governu hala’o sorumutuk iha loron 10 fulan-outubru, iha Palásiu Governu, iha Dili, atu analiza estratéjia kona-ba divulgasaun Programa, bainhira, iha tempu ne’ebé hanesan, Ministru iha Prezidénsia Konsellu Ministrus, Adriano do Nascimento, entrega dokumentu ne’e ba Parlamentu Nasionál.
Membru Governu sira analiza ona planu komunikasaun nian atu fó hatene loloos konteúdu husi dokumentu ne’ebé kontein objetivu sira Governu nian ba governasaun durante tinan lima oinmai, ba populasaun tomak, liuliu iha área rurál sira.
Programa ida ne’e la’o tuir kompromisu husi partidu sira, ne’ebé bazeia ba Planu Estratéjiku Dezenvolvimentu nian no ba Objetivu sira husi Dezenvolvimentu Sustentavel, hodi fó konsisténsia no dinámika foun ida ba matadalan boot rua ne’e, no, liuliu, ba Nasaun. Preokupasaun boot husi Governu Konstitusionál VII maka halo despeza sira sai efisiente no efikás liután, iha prosesu konstrusaun país nian, atu nune’e bele fó oportunidade ne’ebé maka timoroan sira hotu hakarak atu hetan, iha “Timor-Leste ida ne’ebé inkluzivu, justu no moris-di’ak liu”.
Ministru Planu No Finansas, Rui Gomes, aprezenta serbisu ne’ebé dezenvolve hela ba elaborasaun Orsamentu Estadu Retifikativu nian, ho ajuste sira ne’ebé maka presiza adapta ba estrutura foun Governu nian no avalia kompromisu hirak ne’ebé mak asume, hodi asegura mós, kumprimentu ba objetivu Ezekutivu nian, atu evita gasta osan la tuir nia dalan. REMATA