Membru sira husi Governu Konstitusionál VII hasoru-malu hodi prepara hahú mandatu
Prezidénsia Konsellu Ministrus
VII Governu Konstitusionál
..............................................................................................................................
Dili, loron 19 fulan setembru tinan 2017
Komunikadu Imprensa
Membru sira husi Governu Konstitusionál VII hasoru-malu hodi prepara hahú mandatu
Governu Konstitusionál VII hala’o sorumutuk iha loron-tersa ne’e, loron 19 fulan-setembru, iha Palásiu Nobre Lahane, iha Dili, hafoin simu pose, iha loron-sesta liubá. Iha sorumutuk Ezekutivu dahuluk nian ne’e, membru Governu sira halo debate kona-ba kestaun fundamentál sira ba hahú mandatu nian, liuliu Governu ninia Programa no Orsamentu Jerál Estadu nian.
Formasaun Governu nian tenke remata iha tempu badak, garante Primeiru-Ministru, Marí Alkatiri.
Membru Governu na’in sanulu-resin ida ne’ebé marka prezensa iha sorumutuk ne’e debate prioridade sira husi Programa Governu nian. Primeiru-Ministru ne’e garante katak Programa Governu nian ne’e sei elabora hodi konsidera ba komponente tolu: kompromisu husi partidu sira ne’ebé forma koligasaun – Fretilin no PD –, atividade sira ne’ebé hala’o hela no Planu Estratéjiku Dezenvolvimentu.
Define ona mós pasu sira ba elabora Orsamentu Jerál Estadu Retifikativu, ne’ebé koordena husi Ministériu Planu no Finansas, sei konklui hafoin formasaun Governu nian remata.
Membru Governu nian sira barak halo mós pontu situasaun ida kona-ba informasaun ne’ebé halibur iha loron dahuluk sira governasaun nian, iha ne’ebé hahú hala’o ona pasajen pasta ba ministru atuál sira.
Ministru Estadu no Konselleiru ba Seguransa Nasionál, José Ramos-Horta, la partisipa iha sorumutuk ne’e tanba iha vizita serbisu nian ba Estadus Unidus, hodi reprezenta Prezidente Repúblika iha Nasoins Unidas. REMATA
