Governu Timor-Leste

Ministru Estadu, Koordenadór Asuntus Ekonómikus (MEKAE) no Ministru Agrikultura no Peskas (MAP), Estanislau Aleixo da Silva, hala’o vizita ba Aldeia Klakuk no Aldeia Fatu Kahe, iha Postu Administrativu Fatuberliu, Munisípiu Manufahi, iha loron 10 fulan-agostu atu haree lala’ok projetu empriendedorizmu lokál nian tolu: akuakultura (viveiru ikan, boek ka kadiuk bee midar nian), agropekuária (serbisu iha to’os, natar no hakiak balada) no panifikasaun (halo paun).

Projetu akuakultura ne’e tuir planu sei harii tanke rua iha rai ho luan ektare 20, ne'ebé komunidade lokál fó atubele hakiak ikan Tilápia.

Akompaña husi Diretór-Jerál Peskas, Acácio Guterres, no husi Diretora Nasionál Veterinária, Joanita Bendita da Costa, Ministru Estanislau da Silva agradese ba populasaun aldeia Klakuk no aldeia Fatu Kahe nian tanba rai ne’ebé sira fó ona no informa katak “iha ona orsamentu atu sosa materiál konstrusaun nian atubele hahú obra sira-ne’e”.

Iha aldeia Klakuk, Ministru Agrikultura no Peskas hasoru-malu mós ho grupu Jerasaun Foun Nalolo Tiro (JERFONT) no grupu Talioan. Grupu ida uluk ne’e hala’o atividade hakiak karau-vaka no ida daruak ne’e hala’o atividade tunu paun nian. Grupu rua ne’e simu ona apoiu Governu (subvensaun públika) liuhusi Gabinete MEKAE nian. 

Estanislau da Silva hateten katak nia sente “orgullu ho serbisu ne’ebé grupu rua ne’e nian, ne’ebé harii husi foin-sa’e sira,  atu hadi’a ekonomia familiár no hamenus dezempregu. Maske orsamentu ne’ebé sira simu ne’e ki’ik, sira bele jere ho di’ak tebes”.

Ministru ne’e fó hanoin mós ba foin-sa’e sira katak, karik sira hakarak atu halo sira-nia negósiu sai boot liután, Banku Nasionál Komérsiu Timor-Leste nian (BNCTL) fó posibilidade ba sira atu hetan asesu ba kréditu, ho funan 6%, no fó neon-moris ba emprezáriu sira atu buka informasaun.