Aniversáriu FALINTIL da-42
Selebrasaun Aniversáriu FALINTIL da-42, ne’ebé organiza husi Ministériu Defeza, hala’o husi loron 7 to’o 20 fulan-agostu, iha Dili.
Kompetisaun desportiva ida entre ministériu sira hala’o husi loron 7 to’o 18, iha kampu futsál kuartél-jenerál F-FDTL nian, iha Fatuhada.
Iha loron 19, iha tuku 9:00, sei iha Misa Agradesimentu ida, iha igreja Santu António, iha Motael, Dili. Iha oras besik meiudia nian, sei fó omenajen ba eroi nasionál sira, iha Jardín Eroi sira nian, iha Metinaru.
Iha loron 20, loron aniversáriu FALINTIL nian, iha tuku 8:30, sei hahú serimónia militár iha kuartél-jenerál F-FDTL nian no Prezidente Repúblika, Francisco Guterres Lú Olo, tuir previzaun, sei to’o iha tuku 9:30.
Hafoin onra militár sira, no integrasaun Estandarte Nasionál ba Forsa iha Parada, sei hala’o omenajen atu hanoin hikas Eroi Nasionál sira ne’ebé mate tiha ona iha funu laran. Molok diskursu Xefe Estadu-Maiór-Jenerál F-FDTL, Maiór-Jenerál Lere Anan Timur nian, no Prezidente Repúblika nian, sei fó-sai promosaun militár. Tau ona mós iha ajenda, aprezentasaun ida husi estudante sira ne’ebé hala’o marxa atu fó omenajen ba FALINTIL, tuir kedas ho momentu muzikál ida kona-ba Eroi Pátria nian sira. Molok “cocktail” maktakak nian, iha oras besik meiudia, sei iha demonstrasaun militár ida.
