Governu Lansa CD Timor-Maubere “Músicas da Resistência”
Timor-Maubere “Músicas da Resistência” maka disku ida ho múzika 12 ne’ebé kanta husi veteranu sira, barak liu hakerek husi dirijente atuál sira no figura koñesidu sira husi istória Rezisténsia nian. Disku ne’e aprezenta iha loron 4 fulan-agostu iha Palásiu Governu nian, husi Primeiru-Ministru no Ministru Estadu na’in rua, Agio Pereira no Estanislau da Silva.
Grupu muzikál, ne’ebé kompostu husi antigu Gerrilleiru na’in hitu, toka múzika haat iha eventu ne’e: “Maubere Timor”, ho letra husi Kay Rala Xanana Gusmão (atuál Ministru Planeamentu no Investimentu Estratéjiku) no múzika husi Berliku, “Prezidente Nicolau Labato”, ne’ebé hakerek husi Mari Alkatiri (Prezidente Zona Espesiál Ekonomia Sosiál Merkadu nian - ZEESM) no múzika husi Estanislau da Silva (Ministru Estadu, Koordenadór Asuntus Ekonómikus no Ministru Agrikultura no Peskas), “3 de março”, husi Kay Rala Xanana Gusmão no “Buka tuir”, husi Antoninho Baptista Alves “Hamar” (atuál Diretór Arkivu no Muzeu Resisténsia Timorense).
Deputadu no Prezidente Asosiasaun Kombatente Veteranu sira husi Luta Libertasaun Nasionál nian (ACVLLN, sigla iha ian portugés) David Ximenes, halo diskursu reflesaun nian ida ne’ebé emosionadu kona-ba tempu rezisténsia nian no gerrilleru sira-nia terus durante luta ba restaurasaun Independénsia nian.
Iha momentu impar ida, ne’ebé reflete emosaun ne’ebé sente iha eventu ne’e, sein iha previzaun ida antes, audiénsia, ne’ebé barak liu maka antigu kombatente no funsionáriu sira Palásiu Governu nian, hetan supreza ida ho atuasaun espontánea husi Ministru Estadu na’in rua, ne’ebé sa’e ba palku no kanta hikas fali múzika antiga sira husi tempu luta nian.
Gravasaun CD ne’e, ne’ebé bele hola iha ACVLLN, hanesan inisiativa ida husi Gabinete Primeiru-Ministru, ho objetivu fó omenajen ba rezisténsia timoroan nian hahú husi sira ne’ebé maka hala’o diretamente iha tempu ne’ebá.
