Governu aprova imajen Timor-Leste nian hanesan destinu turístiku

Governu halo tan pasu ida hodi apoia setór Turizmu nian, liuhusi aprovasaun imajen marka nian (“branding”) atu lori Timor-Leste ba merkadu globál. Inklui iha imajen marka nian ne’e maka logótipu, elementu konsepsaun nian sira ne’ebé iha ligasaun no lema ida ne’ebé iha relasaun ho marka ne’e. Serbisu sira ne’e dezenvolve ona durante fulan 18 ikus ne’e, husi Ministériu Turizmu, Artes no Kultura no ONG Asia Foundation. Rezultadu ikus sei fó-sai iha tempu badak, iha pájina ofisiál turizmu nian, iha www.timorleste.tl.

Komponente sira husi jestaun marka ne’e nian dezenvolve ona tuir perspetiva ekipa nian husi departementu marketing no produtu turístiku Ministériu Turizmu, Artes no Kultura nian. Governu hakarak “promove Timor-Leste hanesan destinu ida ne’ebé hakmatek no akolledór ne’ebé oferese furak naturál, istória ida ne’ebé riku no esperiénsia kulturál únika ida”. Vizaun ida ne’e la’o hamutuk ho Polítika Nasionál Turizmu nian ne’ebé aprova ona husi Governu iha loron 7 fulan-marsu tinan ida-ne’e, dokumentu ida ne’ebé, ba dala uluk, define polítika públika ida ne’ebé klaru, ne’ebé presiza atu asegura kreximentu efetivu, efisiente no sustentavel Turizmu nian.

Dezenvolvimentu projetu ne’e nian envolve konsulta ho parte interesada sira husi setór privadu no ONG, hala’o ona inkéritu atu koko merkadu-alvu, rona hanoin husi peritu kona-ba akonsellamentu estratéjiku no aplika ona talentu husi dezeñadór profisionál timoroan sira.

Ho aprovasaun ba komponente sira husi jestaun marka nian ne’e husi Konsellu Ministrus iha loron 11 fulan-jullu tinan 2017, maka atinje ona objetivu importante tolu husi Governu Konstitusionál VI. Aleinde kriasaun no aprovasaun ba imajen marka nian no aprovasaun ba Polítika Nasionál Turizmu nian, Governu lansa ona pájina ofisiál turizmu nian iha www.timorleste.tl, iha fulan-outubru tinan kotuk, hodi hasa’e perfíl Timor-Leste nian iha nivel internasionál no ajuda sira ne’ebé iha interese hodi transforma sira-nia “vizaun ba-iha vizita ida”. Dezde ninia lansamentu, site ne’e simu ona vizita 11.000 resin.

Portavós, Ministru Estadu Agio Pereira, observa katak “elementu exelente sira husi jestaun marka nian ne’e atu hato’o ho forma perfeita ita-nia kualidade singulár no ninia aprovasaun marka etapa foun ida iha ita-nia dalan atu aprezenta Timor-Leste hanesan destinu turístiku ida ne’ebé maka atrativu tebe-tebes. Ita nia esforsu kona-ba turizmu kria daudaun dinámika pozitivu ida. Ita tenke fó kontinuidade, atu ita bele alkansa potensiál setór ida-ne’e nian no atu apoia dezenvolvimentu sustentavel nasaun nian”. REMATA