Atividade Governu nian durante períodu kampaña eleitorál
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 5 fulan-jullu tinan 2017
Atividade Governu nian durante períodu kampaña eleitorál
Serbisu Governu Konstitusionál IV nian kontinua la’o durante períodu ofisiál kampaña nian molok tama ba eleisaun Parlamentár sira nian iha loron 22 fulan-jullu. Maske membru Governu barak foti ona férias, atubele halo kampaña durante períodu ida ne’e, desizaun sira kontinua foti no atividade Governu nian hotu-hotu la’o nafatin.
Períodu ofisiál kampaña nian ne’e hahú iha loron 20 fulan-juñu no sei remata iha loron 19 fulan-jullu.
Durante sorumutuk Konsellu Ministrus nian iha semana ikus, diskute no aprova ona lejizlasaun importante iha área Turizmu, Reforma Ekonómika, akreditasaun ba instituisaun Ensinu Superiór sira no aplikasaun Rejime Kontributivu Seguransa Sosiál nian.
Tuir prosesu eleitorál ne´bé fo´sai ona hanesan Prioridada Nasionál neen ba tinan 2017 ne´bé identifika iha fulan jullu iha tinan liubá.
Prosesu eleitorál ne’e ezije serbisu ida ne’ebé estraordináriu tebes husi parte Komisaun Nasionál Eleisoins nian [sigla iha lian portugés CNE], husi Sekretariadu Tékniku Administrasaun Eleitorál [STAE], no husi Ministériu Administrasaun Estatál no Ministériu Interiór.
Primeiru-Ministru interinu, Ministru Estadu Agio Pereira konfirma: ”Governu kontinua hala’o serbisu badinas no responsavel, iha períodu molok aleisaun. Ami hahii ba serbisu maka’as ne’ebé hala’o hela atu garante katak prosesu eleitorál, ne’ebé Governu identifika nu’udar Prioridade Nasionál ida ba tinan 2017, bele sai susesu boot ida.” REMATA
