Kampaña Eleitorál hahú ona, preparativu eleitorál sira la’o tuir planu
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, loron 21 fulan-juñu tinan 2017
Kampaña Eleitorál hahú ona, preparativu eleitorál sira la’o tuir planu
Governu, liuhusi Komisaun Nasionál ba Eleisaun (CNE, sigla iha lian portugés), Sekretariadu Tékniku Administrasaun Eleitorál (STAE), Ministériu Administrasaun Estatál no Ministériu Interiór, daudaun ne’e sei remata hela preparativu importante sira ba eleisaun parlamentár iha loron 22 fulan-jullu tinan 2017.
Períodu ofisiál kampaña nian hala’o iha loron 20 fulan-juñu to’o loron 19 fulan-jullu tinan 2017. Kalendáriu ba Kampaña bele haree iha sítiu Internét Komisaun Nasionál Eleisaun nian.
Iha semana kotuk remata ona prosesu rejistu nian no verifikasaun ba partidu no koligasaun sira ne’ebé hola parte iha eleisaun sira. Iha boletín votu nian sei tau iha lista partidu 20 no koligasaun ida, tuir orden ne’ebé determina ona husi sorteiu, iha mós semana liubá.
Iha loron 22 fulan-jullu, eleitór sira ne’ebé rejistu ona sei ba vota husi tuku 7:00 dadeer to’o tuku 3:00 loro-kraik, iha estasaun votasaun oioin ne’ebé namkari iha nasaun laran. Tenke halo marka ida iha boletín votu nian, iha kuadradu husi partidu ne’ebé hakarak hili. Kadeira 65 iha Parlamentu Nasionál sei fahe tuir númeru votu sira ne’ebé simu ona husi partidu ida-idak. Atu hetan kadeira, partidu sira simu liuhusi 4% husi totál votu sira ne’ebé konta ona.
Ida-idak husi partidu 20 no koligasaun rejista ona lista ba sira-nia kandidatu prinsipál 65 no lista ida husi sira-nia kandidatu suplementár sira.
Daudaun ne’e hala’o hela programa alargadu ida hodi fó hatene ba eleitór sira kona-ba prosesu eleitorál.
Iha semana kotuk, Ministru Estadu Koordenadór Asuntus Administrasaun Estadu no Justisa no Ministru Administrasaun Estatál, Dionísio Babo Soares, hasoru-malu ho membru korpu diplomátiku sira no parseiru sira dezenvolvimentu nian, hodi fó hatene kona-ba preparativu sira.
Portavós Governu nian, Ministru Estadu Agio Pereira, hatete katak “partidu polítiku, instituisaun eleitorál sira, dirijente nasionál sira no Governu oras ne’e hotu-hotu serbisu hela hodi garante eleisaun ida ho hakmatek, organizada no konstrutiva. Ita sente orgullu tanba ita iha nasaun ida ne’ebé partidu sira bele halo kampaña ho forma ne’ebé nakloke no sidadaun sira bele hala’o sira-nia direitu demokrátiku ho livre, buat ne’ebé mak ita hetan ho folin boot tebes husi ema hotu ne’ebé envolve an iha luta ba ita-nia ukun-rasik an. Ita fó ónra ba sira-nia liman-rohan liuhusi ita-nia hahalok lorloron nian, ba eleisaun loron 22 fulan-jullu ne’ebé hakbesik daudaun mai. REMATA
Kalendáriu kona-ba eleisaun parlamentár bele haree iha ne’e.
