Governu Timor-Leste

Ministru Planeamentu no Investimentu Estratéjiku, Xanana Gusmão, hamutuk ho Vise-Ministru Negósius Estranjeirus no Kooperasaun, Roberto Sarmento Soares, vizita Portugál iha fulan-maiu nia rohan, hodi hametin lasu kooperasaun no amizade entre nasaun rua ne’e no konkretiza abertura reprezentasaun ofisiál g7+ nian ida iha Europa.

Akordu atu instala sede g7+ nian iha Lizboa ne’e asina ona husi Prezidente Kámara Munisipál Lizboa nian, Fernanda Medina, Sekretáriu-Jerál g7+ nian, Hélder da Costa, no Ministru Xanana Gusmão.

Durante vizita loron tolu iha Portugál ne’e, Vise-Ministru Negósius Estranjeirus no Kooperasaun, marka mós prezensa iha asinatura akordu, hala’o sorumutuk rua ho membru Governu portugés sira. Ba ninia omóloga, Sekretária Estadu Negósius Estranjeirus no Kooperasaun, Teresa Ribeiro, nia garante katak, hafoin eleisaun sira oin-mai ne’e, maske sei iha mudansa Governu, “polítika no kompromisu timoroan sira nian kona-ba Portugál sei la muda”. Vise-Ministru ne’e mós simu serteza husi Teresa Ribeiru katak “Portugál sei kontinua fó apoiu ba Timor-Leste iha ninia prosesu dezenvolvimentu nian tomak”. Iha sorumutuk daruak, ho Ministru Edukasaun, Tiago Brandão Rodrigues, sira analiza kona-ba progresu husi reintrodusaun lian portugés iha Timor-Leste. Vise-Ministru ne’e ko’alia kona-ba rezultadu sira husi Kongresu Nasionál Edukasaun nian III, ne’ebé hala’o husi loron 15 to’o loron 17 fulan-maiu, iha ne’ebé kestaun lian sai hanesan tema prinsipál ida husi tema prinsipál hirak ne’ebé maka debate ona.

Sekretáriu Estadu Juventude no Desportu, Leovigildo Hornai, ne’ebé mós marka prezensa iha vizita ida ne’e, hetan konvite atu partisipa iha konferénsia Ministru Juventude no Desportu sira nian, ne’ebé sei hala’o husi loron 27 no loron 30 fulan-jullu, iha Portugál.

Komitiva ne’e vizita Bispu Eméritu Dili nian no Prémiu Nobel Pás nian, Dom Carlos Filipe Ximenes Belo, iha Konventu Salezianu Portu. Dom Ximenes Belo hahii “maturidade povu Timór nian ne’ebé kaer-metin nafatin pás no hakmatek durante eleisaun prezidensiál”, no hahii mós “esforsu Governu nian hodi loke sentru votasaun nian sira iha Portugál, atu nune’e komunidade ne’ebé hela iha nasaun ne’e bele hala’o sira-nia direitu”.

Komitiva timoroan, iha vizita ne’e, akompaña husi Primeira Sekretária Embaixada Timor-Leste nian iha Portugál, Maria Loudes Ximenes, no husi Diretór Asuntu Eropa, Áfrika no Médiu Oriente nian sira, Armindo Simões.