Ministru Koordenadór Asuntus Sosiais halo vizita serbisu nian ba Filipina, Kuba no Portugál
Ministru Estadu, Koordenadór Asuntus Sosiais no Ministru Edukasaun, António da Conceição, hala’o vizita serbisu nian ida, hodi fó kontinuasaun ba relasaun kooperasaun nian ne’ebé di’ak no halo diálogu ho entidade parseira sira.
Husi loron 6 to’o loron 9 fulan-juñu, iha Repúblika Filipinas, ho objetivu atu hametin relasaun kooperasaun nian sira ho Ministériu Edukasaun nasaun ne’ebá nian, hanesan formasaun akadémika ba bolseiru timoroan sira iha instituisaun Ensinu Superiór sira.
Husi loron 12 to’o loron 15 fulan-juñu, iha enkontru iha Repúblika Kuba nian, atu analiza situasaun kooperasaun nian ho Universidade Pedagójika Kuba nian no vizita estudante timoroan na’in 25 ne’ebé maka hala’o hela estudu iha instituisaun ne’e. Prevee ona mós enkontru ida ho ninia omóloga, atu diskute renovasaun posivel ba programa alfabetizasaun nian, ne’ebé ninia análize kona-ba rezultadu sira husi ezekusaun iha faze dahuluk hala’o iha tinan 2016 nia rohan.
Husi loron 17 to’o loron 20 fulan-juñu, sei iha Repúblika Portugeza, iha ne’ebé iha sorumutuk ne’ebé marka ona ho ninia omólogu no ho responsavel husi Ministériu Negósius Estranjeirus no Instituto Camões, ne’ebé sai hanesan interlokutór ba projetu prinsipál rua kona-ba kooperasaun bilaterál ho Governu Portugés projetu Sentru Aprendizajen no Formasaun Eskolár (CAFE, sigla iha lian portugés) no Projetu kona-ba Formasaun Profesór sira “Formar+”. Prevee ona mós sorumutuk ida ho Embaixadór Kabuverde nian iha Portugál, atu analiza situasaun estudante timoroan sira nian iha nasaun afrikanu ne’e.
