Loron : 29 fulan-maiu to’o 23 fulan juñu

To’o ba loron 23 fulan-juñu, sei halo sesaun esklaresimentu nian sira kona-ba signifikadu no implikasaun sira husi Rejime Kontributivu Seguransa Sosiál nian. Sesaun sira ne’e sei realiza iha órgaun soberania hotu-hotu no servisu públika sira (Administrasaun Direta no Indireta Estadu nian, servisu no fundu autónomu sira no empreza públika sira), nune’e mós parte ida husi setór privadu.

Hafoin Prezidente Repúblika promulga Lei kona-ba kriasaun Rejime Kontributivu Seguransa Sosiál, iha loron 9 fulan-novembru tinan 2016, iha fulan-maiu liubá hahú asaun divulgasaun (sosializasaun) boot ida kona-ba diploma foun ne’e, iha Ministériu Solidariedade Sosiál (MSS), ne’ebé konvoka husi Komisaun Funsaun Públika. Partisipa iha sosializasaun ne’e ekipa Rekursus Umanus nian husi Ministériu hotu-hotu, nune’e mós husi Tribunál no Prokuradoria, no servisu no fundu autónomu sira balu. Tau ona mós iha ajenda asaun divulgasaun nian ida iha Parlamentu Nasionál.

Ekipa sira husi MSS ne’ebé sai nu’udar responsavel ba Segurnsa Sosiál sei dezloka ba Munisípiu hou-hotu no ba Rejiaun Administrativa Espesiál Oekusi Ambenu (RAEOA), iha ne’ebé sira sei kontaktu ho emprezáriu lokál sira (no Organizasaun La’ós Governu nian sira ne’ebé husu tiha ona atu halo kontaktu).