Governo lança Plano de Ação Nacional para as Crianças

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 2 fulan-juñu tinan 2017

Governu lansa Planu Asaun Nasionál ba Labarik sira

Iha Loron Mundiál Labarik nian, iha loron 1 fulan-juñu, Governu lansa ona ninia Planu Asaun Nasionál ba Labarik sira tinan 2016-2020.

Primeiru-Ministru, Rui Maria de Araújo, hateten katak planu ne’e “hatudu vontade Governu Timor-Leste nian atu kria ambiente ida ne’ebé promove respeitu, protesaun no kumprimentu ba direitu umanu labarik feto no labarik mane sira-nian iha ita-nia nasaun, liuliu sira ne’ebé maka moris iha situasaun susar no iha área remota no rurál sira”.

Planu Asaun ne’e, ne’ebé dezenvolve durante mandatu Governu Konstitusionál VI ida ne’e, kria medida sira hodi garante katak labarik sira bele dezenvolve an iha ambiente ida ne’ebé saudavel, ho asesu ba eskola no edukasaun ida ne’ebé iha kualidade, kondisaun saúde no nutrisaun nian ne’ebé di’ak, iha biban atu partisipa iha sosiedade no protesaun ba sira-nia direitu.

Planu ida ne’e dezenvolve husi Komisaun Nasionál ba Direitu Labarik nian sira, liuhusi konsulta ho organizasaun la’ós governmentál sira, instituisaun sira sosiedade sivíl nian no organizasaun komunitária sira seluk, no hetan apoiu husi UNICEF. Planu ne’e aprezenta ba Konsellu Ministrus iha fulan-setembru tinan 2016 no iha fulan-janeiru tinan ida ne’e, halo ona rezolusaun ida atu ezekuta planu ne’e.

Durante ninia mandatu, Governu ne’e serbisu ona atu hadi’a enkuadramentu lejizlativu kona-ba labarik sira. Iha fulan-fevereiru tinan ida ne’e nian, Konsellu Ministrus aprova ona Proposta Lei kona-ba Protesaun ba Labarik, ne’ebé regula promosaun direitu labarik sira nian no protesaun ba labarik sira ne’ebé iha risku no perigu.

Iha lansamentu, Primeiru-Ministrus hateten katak, atu planu ida-ne’e hetan susesu di’ak, ita tenke “garante finansiamentu ida ne’ebé adekuada no rekursu umanu ba kestaun sira kona-ba infánsia iha ministériu oioin, nune’e mós fó apoiu ba knaar pontu fokál nian atu halo koordenasaun no akompañamentu ba ezekusaun husi Planu Asaun Nasionál ba labarik sira tinan 2016-2020.”

Portavós Governu nian, Ministru Estadu Agio Pereira, hateten katak “iha lansamentu planu ida ne’e nian, Governu kumpre ona ninia objetivu ida husi objetivu sira seluk no hatudu ona valór ne’ebé fó ba labarik no foin-sa’e sira. Sira mak ita-nia nasaun nia futuru! Proteje sira no investe iha sira-nia moris-di’ak maka hanesan ho investe iha susesu no dezenvolvimentu Timor-Leste nian.” REMATA

url: http://timor-leste.gov.tl?lang=tp&p=18139