Governu Timor-Leste

Iha loron 25 fulan-maiu, lansa ona livru “LAMETA” (sigla iha lian inglés ba Movimentu Luzu-Amerikanu ba Autodeterminasaun Timor-Leste nian), husi João Crisóstomo, ne’ebé haktuir iha nia livru ne’e,  kona-ba forma oinsá movimentu luzu-amerikanu kontribui ba independénsia Timor-Leste nian.

Iha aprezentasaun, Primeiru-Ministru, Rui Maria de Araújo, fó hanoin katak nia koñese ona pesoalmente João Crisóstomo, iha fulan-setembru tinan kotuk, durante viajen serbisu nian ida ba Estadus Unidus.

 “Iha tempu ne’ebá, nia ko’alia mai ha’u kona-ba LAMETA no to’o hatudu mai ha’u pasta ida, iha ne’ebé nia rai, hanesan ezemplu, eskrita, rekorte sira husi jornál sira, fotografia no karta sira”, Primeiru-Ministru ne’e esplika. “Maibé ida ne’e la’ós eskritu, rekorte sira husi jornál sira, fotografia no karta baibain. Buat hirak ne’e hanesan testemuñu husi buat ne’ebé maka LAMETA, ka nu’udar livru ne’e rasik hateten, ‘família LAMETA’” halo ona durante tinan barak, ba ita, Timor-Leste, no ba ita ema timoroan”, Na’i -ulun ne’e hatutan.

Entre asaun barak, LAMETA organiza ona asaun protestu sira iha Nasoins Unidas, hakerek ba Prezidente Bill Clinton petisaun ida ho asinatura  1.200 resin husi Estadu norte-amerikanu 50, haruka karta ba Nelson Mandela no telefone dala barak tebes ba ninia gabinete.

Rui Maria de Araújo fó hanoin fali katak “iha faze seluk husi ita-nia istória nian, (LAMETA) haruka mai Timor-Leste kontentór sira ho sasán, ajuda finanseira ne’ebé komunidade portugeza tau-hamutuk liuhusi eventu oin-oin. Sira mós hato’o sira-nia orasaun, solidariedade no sira-nia fiar iha valór sira Umanizmu nian no hatudu momoos tebes kona-ba amizade ida ne’ebé kle’an”

Serimónia ne’e hala’o iha Arkivu no Muzeu Rezisténsia Timorense, iha Dili no konta ho prezensa husi antigu Prezidente Repúblika no Nobel Pás, José Ramos-Horta, husi Ministru Komérsiu, Indústria no Ambiente, Constâncio Pinto, husi diplomata sira, organizasun relijioza sira no instituisaun ensinu sira nian.