Governu Timor-Leste

Bazeia ba proposta husi Governu, kongresista iha Kámara Reprezentante Estadu Massachusetts (iha Estadus Unidus Amérika) nian, António (Tony) Cabral simu ona Medalla Orden Timor-Leste nian, iha Palásiu Governu, husi Primeiru-Ministru, Rui Maria de Araújo, nia liman, iha loron 23 fulan-maiu.

Iha serimónia atribuisaun medalla Orden nian ho prestíjiu boot  no dignidade Estadu nian, Primeiru-Ministru ko’alia liu ba “istória naruk apoiu ba Timor-Leste”, husi Kongresista norte amerikanu orijen husi Portugál “inkluzivamente durante luta ba independénsia”.

Iha ninia diskursu, Rui Maria de Araújo hateten katak Tony Cabral “la hatene kole bainhira defende direitu no liberdade povu timoroan nian iha nivel aas iha Estadus Unidus Amérika no, hanesan buat ne’ebé maka lee tiha ona iha Dekretu Prezidensiál, nia mós maka ema ida ne’ebé lidera aprezentasaun lejizlasaun iha Asembleia Lejizlativa iha Estadu Massachusetts atu fó sansaun ba empreza no negósiu sira iha, ka ho, Repúblika Indonézia iha dékada 90 nia rohan”.

Baibain, medalla ne’e entrega husi Prezidente Repúblika, ne’ebé, iha kazu ida ne’e, delega fali misaun ne’e ba Primeiru-Ministru. Taur Matan Ruak, bainhira sei hala’o knaar nu’udar Prezidente Repúblika, maka dekreta kondekorasaun ne’e, iha fulan-fevereiru tinan ne’e, bazeia ba proposta husi Governu.