Estátua Francisco Xavier do Amaral nian inaugura ona iha Dili

Seg. 22 maiu 2017, 11:22h
IMG_2307

Estátua ida husi Francisco Xavier do Amaral, Proklamadór ba Ukun-rasik an Nasaun nian no Prezidente dahuluk Timor-Leste nian, inaugura ona iha Dili, iha loron 20 fulan-maiu, iha serimónia espesiál ida iha loraik loro-matan monu.

Ministru Estadu, Dionísio Babo Soares, ne’ebé ninia Ministériu Administrasaun Estatál dezempeña knaar importante ida iha konstrusaun monumentu ne’e nian, loke serimónia ne’e hodi agradese ba prezensa husi reprezentante familía sira Francisco Xavier do Amaral nian no ba partisipasaun husi dirijente istóriku sira Timor-Leste nian  iha biban espesiál ne’e.

Ema sira ne’ebé ko’alia iha okaziaun ne’e  maka Ministru Planeamentu no Investimentu Estratéjiku, Kay Rala Xanana Gusmão, antigu Primeiru-Ministru Mari Alkatiri, reprezentante ida husi família Amaral nian no Prezidente Repúblika nian ne’ebé foin simu pose, Francisco Guterres “Lu-Olo”. Sira ne’ebé marka prezensa maka Primeiru-Ministru, Rui Maria de Araújo, no Ministru sira seluk husi Governu Konstitusionál VI.

IMG_2279Ministru Gusmão ko’alia ho domin boot kona-ba Xavier do Amaral, ne’ebé maka mate ona iha tinan 2012. Na’i-ulun ne’e hanoin hikas fali figura istórika no aten-barani ne’e, ne’ebé luta ona ba prinsípiu sira demokrasia nian no ba dignidade povu timoroan nian.

Oradór sira hotu iha serimónia ne’e ko’alia liu kona-ba importánsia husi monumentu ne’e, atu fó hanoin ba jerasaun foin-sa’e sira no ba jerasaun sira ne’ebé sei tuir mai kona-ba ema ida ne’ebé hola parte iha sira-nia istória luta ba libertasaun Timor-Leste nian.

Estátua boot ne’e hatuur iha rotunda besik Sentru Konvensoins Dili. Hafoin lansamentu fogu-festa nian, ne’ebé asiste husi ema rihun ba rihun ne’ebé partisipa iha serimónia ne’e, Prezidente Repúblika asina plaka ne’ebé hatuur iha monumentu ne’e nia huun. Remata bensaun ba estátua no tau ai-funan no sinál omenajen nian ba figuran boot nasionál ne’e, públiku presta ninia respeitu no haksolok iha festa ne’ebé prepara ona iha fatin ne’e.

Painél boot hirak ne’ebé tau hadulas rotunda ne’e hatudu fotografia ikónika, ne’ebé hasai iha momentu halo Proklamasaun ba Independénsia, iha loron 28 fulan-novembru tinan 1975, ho lia-fuan husi Francisco Xavier do Amaral:

 “Hamutuk ita konsolida unidade no estabilidade ba dezenvolvimentu nasionál.”

   Ba leten