Governu hato’o kondolénsia ba Mário Viegas Carrascalão nia mate

Ministru Estadu no Prezidénsia Konsellu Ministru no

  Portavós Ofisiál Governu Timor-Leste

 Díli, loron 19 fulan-maiu tinan 2017

Governu hato’o kondolénsia ba Mário Viegas Carrascalão nia mate

Ho laran susar tebes maka Governu Timor-Leste simu notísia kona-ba Mário Viegas Carrascalão, antigu Vise-Primeiru-Ministru Governu Konstitusionál IV no figura polítika importante ida iha Timor-Leste, nia mate ohin dadeersan ne’e. Hodi Governu nia naran, Primeiru-Ministru, Rui Maria de Araújo, hato’o sentida kondolénsia ba família, belun no kolega sira Mário Carrascalão nian no fó omenajen ba ninia kontributu ne’ebé nia fó ona ba Nasaun ne’e.

Mário Carrascalão selebra ninia aniversáriu ba da-80 foin daudaun ne’e no simu Kolár Orden Timor-Leste nian husi Prezidente Repúblika nia liman, ba rekoñesimentu husi servisu ne’ebé nia fó ona ba nasaun ne’e.

Mário Carrascalão moris iha Venilale, Baukau, iha loron 12 fulan-maiu tinan 1937. Simu graduasaun Enjeñaria nian iha Portugál no hafoin fila mai Timor, serbisu hanesan Xefe Departamentu Florestas no Agrikultura. Iha tinan 1974, sai nu’udar fundadór no Prezidente ba Uniaun Demokrátika Timorense [UDT]. Durante okupasaun Indonézia nian, sai nu’udar Governadór, husi tinan 1982 to’o 1992, no tuir mai hala’o ninia knaar fundamentál ida iha prosesu tranzisaun nian, ba preparasaun governasaun pós-independénsia ida. Iha ne’e inklui ninia knaar  nu’udar Portavós Konsellu Nasionál no nu’udar Vise-Prezidente Konsellu Nasionál Rezisténsia Timorense. Iha tinan 2000, forma Partidu Sosiál Demokrátiku [PSD] no sai mós hanesan partidu ne’e nia dirijente. Iha tinan 2006, lansa ninia autobiografia ho títulu “Timor – Antes do Futuro” (“Timor – Molok Futuru”). Iha tinan 2008, iha ámbitu remodelasaun governamentál ida, Mário Carrascalão simu pose nu’udar Vise-Primeiru-Ministru Koordenadór Asuntus Jestaun Administrasaun Estadu husi Governu Konstitusionál IV.

Portavóz Governu nian, Ministériu Estadu Agio Pereira, hatete katak “ho laran susar tebtebes ita simu notísia kona-ba dirijente enerjíku no pragmátiku nia mate, ne’ebé fó laran tomak no ho vontade boot tebes atu serbí Nasaun. Ita hato’o ita-nia sentimentu ba família Carrascalão, iha momentu susar ida ne’e”. REMATA

url: http://timor-leste.gov.tl?lang=tp&p=17974