Governu Timor-Leste

Primeiru-Ministru, Dr. Rui Maria de Araújo, partisipa iha konferénsia internasionál kona-ba liberdade Imprensa no liberdade espresaun iha rejiaun sudeste aziátiku no pasífiku iha ámbitu komemorasaun aniversáriu Konsellu Imprensa Timor-Leste nian ba dala uluk. Konferénsia ne’e hala’o iha loron 10 fulan-maiu tinan 2017, iha salaun Delta Nova, iha Dili.

Tema ba komemorasaun ne’e nian iha tinan 2017 maka “Hanoin krítiku ba tempu krítiku sira: knaar komunikasaun sosiál nian iha avansu sosiedade pasífika no justa sira”. Tema ida ne’e liga diretamente ba kontribuisaun husi jurnalizmu ne’ebé livre no ho kualidade atu atinje objetivu 16 husi Objetivu sira husi Dezenvolvimentu Sustentavel (ODS), atu promove sosiedade ida ne’ebé pasífika no inkluziva.

Primeiru-Ministru hateten katak Timor-Leste hatene di’ak kona-ba importánsia husi imprensa, tantu iha tempu luta ba libertasaun nasionál no mós iha tempu ukun an nian. “Papel husi imprensa ne’ebé livre importante tebe-tebes ba pás, estabilidade no demokrasia iha ita-nia rain. Jornalizmu ne’ebe ho kualidade ajuda ita-nia prosesu luta ba libertasaun. Jornalista balun fó sira-nia vida atu hato’o faktu kona-ba invazaun no luta libertasaun. Profisionalizmu ida ne’e ajuda ona ita liberta ona ita-nia pátria. Husi ne’e ba oin, iha liberdade povu nian, ita presiza nafatin jornalizmu ne’ebé ho kualidade no profisionál hodi ajuda dezenvolvimentu rai ida ne’e ba oin”, haktuir Primeiru-Ministru.

Bazeia ba Índise Mundiál kona-ba Liberdade Imprensa iha 2017, Timor-Leste hetan klasifikasaun aas liu iha rejiaun sudezte-aziátiku, no, iha nivel mundiál, okupa pozisaun 98 husi nasaun 180 iha mundu tomak ne’ebé hetan avaliasaun.

 Xefe Ezekutivu dehan mós katak Konsellu Imprensa Timor-Leste nian iha papél importante atu garante profisionalizmu meiu komunikasaun sosiál sira nian. Na’i-ulun ne’e mós hato’o parabens ba “Konsellu Imprensa no jornalista sira hotu iha Timor-Leste laran tomak ne’ebé hala’o serbisu maka’as hodi informa ba ita-nia sosiedade. Ita hotu mós tenke sente orgullu ba buat hotu ne’ebé mak ita konsege halo ona durante tinan 15, inklui iha área liberdade imprensa nian. Maibé ita presiza mós dezafia ita-nia an atu halo buat ne’ebe di’ak liu hodi prienxe independénsia no dezenvolvimentu iha ita-nia rain”.

Partisipa mós iha konferénsia ne’e, Vise-Ministru Negósius Estranjeirus no Kooperasaun, Roberto Soares, Sekretáriu Estadu Komunikasaun Sosiál, Nelio Isaac Sarmento, Prezidente no Reprezentante sira husi Konsellu Imprensa sira husi nasaun sira husi Sudeste Aziátiku, Pasífiku, Austrália, Áfrika, jornalista sira, na’in husi órgaun komunikasaun sosiál sira iha Timor-Leste no estudante universitáriu sira.