Governu Timor-Leste

Data: husi loron 15 to’o 17 fulan-maiu
Fatin: Salaun Komisaun Nasionál Eleisoins, Kaikoli, Dili

“Edukasaun maka pilár ba konsolidasaun Identidade no konsolidasaun Dezenvolvimentu Nasaun nian” nu’udar tema husi edisaun Kongresu tinan ida ne’e nian, ne’ebé sei ko’alia kona-ba tema oioin iha área Edukasaun nia laran.

Iha loron dahuluk, loron 15 fulan-maiu, sei iha palestra ida ho tema “Mehi kona-ba Edukasaun: vizaun ida ba Timor-Leste”, ho partisipasaun husi antigu Prezidente Repúblika no Prémiu Nobel Pás, José Ramos Horta, antigu Primeiru-Ministru no atuál Prezidente Rejiaun Administrativa Espesiál Oekusi Ambenu, Mari Alkatiri, no husi Reitór Institutu Filozofia no Teolojia Fatumeta nian, Padre Domingos Alves. Iha parte loro-kraik nian, sei iha aprezentasaun no análize ida kona-ba perspetiva setór Edukasaun tinan 2017 nian.

Ba loron 16, iha parte dadeer, tau ona iha ajenda palestra ida kona-ba tema jerál Kongresu nian, ne’ebé dirije husi Enjeñeiru Mário Viegas Carrascalão. Ida ne’e hotu tiha, sei iha sesaun temátika paralelu haat to’o lokraik:
- Kurríkulu Nasionál Ensinu nian no jestaun no formasaun profesór sira
nian
- Jestaun kona-ba Ensinu Superiór públiku no privadu
- Administrasaun, Inspesaun Eskolár, infraestrutura no rekursu edukativu
sira;
- Partisipasaun husi inan-aman, komunidade, setór privadu no parseiru
sira seluk

Iha loron ikus, sei aprezenta rezultadu sira husi sesaun temátika sira no sei iha palestra ida kona-ba “Polítika jestaun no administrasaun nian iha setór Edukasaun nian”, ho Eis-Ministru Ensinu Superiór Kabuverde nian, António Correia e Silva.
Iha parte ikus nian, sei halo rezumu husi sesaun sira iha Deklarasaun Kongresu nian, ne’ebé aprezenta husi Diretór-Jerál Polítika, Planeamentu no Parseria nian, Antoninho Pires.
Iha sesaun maktakak nian sei marka prezensa Primeiru-Ministru, Rui Maria de Araújo no Ministru Estadu, Koorednadór Asuntus Sosiais no Ministru Edukasaun, António da Conceição.