Governu Timor-Leste

Konsellu Konsultivu no Konsellu Ezekutivu husi Estrutura Ekonómika Governu nian analiza fila-fali evolusaun husi atividade sira ne’ebé desenvolve tiha ona ba reforma ekonómika país nian, iha setór Mina-rai no Gás, Agrikultura, Peskas, Turizmu no Indústria Transformadora, iha loron 24 fulan-abríl.

Ida ne’e ba dala tolu ona I maka Ministru Estadu, Koordenadór Asuntus Ekonómikus no Ministru Agrikultura no Peskas nian, Estanislau Aleixo da Silva, halibur hamutuk instituisaun sira ne’ebé sira-nia knaar no prestasaun serbisu, Ministru ne’e mak akompaña no avalia,. Sorumutuk ne’e hala’o fulan tolu dala ida.

Ministru ne’e ko’alia liu kona-ba faktu polítika nasionál Turizmu nian ne’ebé iha ona dezenvolvimentu, “rezultadu husi koordenasaun di’ak ho Ministériu Turizmu, Artes no Kultura”. Ministru Negósius Estranjeirus no Kooperasaun, Hernâni Coelho, hateten katak “ita presiza promove turizmu Timor-Leste nian iha rai-li’ur, tanba ne’e, presiza dezenvolve pakote ida iha área turizmu nian”.

Ba Ministru ne’ebé maka tutela ba pasta ida ne’e, Francisco Kalbuladi Lay, atu promove turizmu iha rai-li’ur ezije servisu ida hamutuk, siginifika, dezenvolve infraestrutura sira, iha koordenasaun ho Ministériu Obras Públikas, Transportes no Komunikasoins. Na’i-ulun ne’e mós hatutan katak, atu simu turista sira, presiza tebes apoiu husi Sekretaria Estadu ba Polítika Formasaun Profisionál no Empregu (SEFOPE), atubele halo formasaun ba rekursu umanu sira iha área ospitalidade nian.

Ministru Alfredo Pires informa katak Ministériu Petróleu no Rekursus Minerais dezenvolve hela estudu ida kona-ba esplorasaun mina-rai no gás iha rai-maran. Ba ida ne’e, Autoridade Nasionál Petróleu no Minerál (ANPM), TIMOR-GAP no Timor Resources (filiál husi empreza australiana Napean) asina ona kontratu rua atu fahe produsaun ba esplorasaun mina-rai no gás nian iha territóriu Timor-Leste, iha loron 7 fulan-abril liubá. 

Sorumutuk ne’e hala’o iha instalasaun Tradeinvest nian no sira ne’ebé marka prezensa maka-Vise Ministru Agrikultura no Peskas, Marcos da Cruz, Diretór-Jerál Indústria no Kooperativa husi Ministériu Komérsiu, Indústria no Ambiente, António da Costa, Sekretáriu-Jerál Servisu Korporativu sira husi Ministériu Obras Públika, Transportes no Komunikasoins, José Perreira Mestre, no Direitór-Jerál SEPFOPE nian, Jacinto Barros Gusmão.