Sekretária Estadu ba Apoiu no Promosaun Sósiu-Ekonómika Feto nian , liuhosi Diresaun Nasionál Abordajen Integradu Jéneru no Formasaun Feto nian, hala’o formasaun bázika ida kona-ba jéneru no Lei kontra Violénsia Doméstika ba ema ho defisiénsia, , iha Dili, iha loron 4 fulan-abríl tinan 2017.

Objetivu hosi formasaun ida ne’e mak atu fahe informasaun no hasa’e koñesimentu ba ema ho defisiénsia sira atu nune’e sira mós bele tulun fila-fali sira-nia kolega sira seluk ne’ebé iha situasaun hanesan, iha sira-nia hela-fatin ka bairru sira.

Tuir Diretór-Jerál Sekretária Estadu nian, Armando da Costa, hateten: “Programa ida ne’e halo parte husi implementasaun polítika Governu nian ne’ebé trasa tiha ona ba Ministériu Solidariedade Sosiál ba ema sira ho defisiénsia.”

Diretór-Jerál ne’e hatutan tan katak, Governu mós adopta Objetivu sira husi Dezenvolvimentu Sustentavel ho moto, “sei la husik ema ida ba kotuk” iha prosesu dezenvolvimentu ida ne’e. Signifika katak ita-nia dezenvolvimentu ida ne’e ita sei kobre no atinje ema hotu, inklui maluk sira ne’ebé iha kondisaun vulneravel. 

Diretór-Jerál ne’e informa mós katak, “ita haree ita-nia maluk sira ho difisiénsia sira mós partisipa di’ak iha prosesu dezenvolvimentu, sira mós iha organizasaun oin-oin ne’ebé tulun no fó apoiu hodi bele fasilita sira-nia nesesidade espesífiku sira”.

Partisipante sira iha formasaun ida ne’e hamutuk ema na’in 30 ne’ebé mai hosi organizasaun oin-oin husi ema sira ne’ebé ho defisiénsia.