Governu Timor-Leste

Ministru Estadu, Koordenadór Asuntus Ekonómikus no Ministru Agrikultura no Peskas, Estanislau Aleixo da Silva, dezloka ba Munisípiu Likisá iha loron 5 fulan-abríl liubá, atu hala’o atividade balun.

Iha aldeia Mota-Ulun, iha Postu Administrativu Bazartete nian, Na’i-ulun ne’e partisipa iha kuda ai-horis au husi variedade Bertar (variante ida husi variante lima ne’ebé eziste iha nasaun ne’e). Ministru ne’e hateten sai katak ho kuda au ne’e bele tulun ekonomia empreza ki’ik no empreza média sira ka grupu sira no sai hanesan fatór ida ba diversifikasaun ekonómika nasaun ne’e nian. Daudaun ne’e, produsaun au abranje ona territóriu nasionál, ho plantasaun iha munisípiu 12 no iha Rejiaun Autónoma Espesiál Oekusi Ambenu. Produtu ne’e iha potensialidade, la’ós de’it ba merkadu rai-laran maibé mós ba merkadu rai-li’ur, liuliu iha dezenvolvimentu turizmu nian, liuhusi artezanatu, no protesaun rai hasoru erozaun.

Tuirmai, Ministru Estanislau da Silva inaugura Sentru Prosesamentu Institutu Au nian, iha aldeia Hatunau. Atubele akompaña atividade sira institutu ne’e nian no koñese materiál sira ne’ebé maka halo husi ai-horis ida ne’e, maka lansa ona mós nia website.

Ikus liu, Ministru ne’e partisipa iha loron dahuluk husi debate durante loron tolu ho Komisaun-D Parlamentu Nasionál, ba aprovasaun iha espesialidade ba Lei Investimentu Privadu, iha Lauhata. Lei ida ne’e ninia objetivu mak atu kria kuadru jurídiku ida ne’ebé transparente, modernu no kompetitivu, ne’ebé dudu investimentu privadu nasionál no mós investimentu diretu husi rai-li’ur. Sorumutuk ne’e hakotu iha loron 7 fulan-abríl.