Governu Timor-Leste

Atu komemora Loron Mundiál Bee nian ne’ebé monu iha loron 22 fulan-marsu, Ministériu Obras Publikas Transportes no Komunikasoins, liuhusi Diresaun Nasional Jéstaun Rekursu Bee nian, organiza atividade kuda ai-oan hamutuk rihun tolu iha aldeia haat iha Suku Bekora, maka hanesan: Kitutu, Darlau, Karau-Mate no Mota-Ulun. Atividade ne’e hala’o iha loron 23 fulan-marsu tinan 2017.

Vise-Ministru Obras Públikas, Transportes no Komunikasoins, Januário da Costa Pereira, iha nia diskursu, hateten katak mundu ohin loron preokupa tebtebes ho bee tanba bee hanesan fatór determinante ba ita ema nia moris, se laiha bee ita sei la moris.

Kona-ba ai-oan sira ne’ebé sei kuda ne’e, Januário Pereira husu ba komunidade iha aldeia haat ne’e atu tau-matan nafatin atu nune’e bele konserva bee-matan Bena Mauk nu’udar bee-matan ida mós ne’ebé fornese bee ba komunidade iha sidade Dili.

Apelu atu tau-matan ba ai-oan sira ne’ebé sei kuda ne’e mai mós husi Administradór Postu Administrasaun Kristu Rei nian, Gaspar Sarmento, no mós Diretor Nasionál Jestaun Rekursu Bee nian, Gustavo da Cruz. Dalan ida entre dalan sira seluk atu tau-matan ba ai-oan sira ne’e maka kuidadu animál sira atu labele estragra.