Primeiru-Ministru partisipa iha selebrasaun Loron Mundiál Bee nian iha Tibar
Primeiru-Ministru, Dr. Rui Maria de Araújo, partisipa iha selebrasaun Loron Mundiál Bee nian, ne’ebé iha tinan ida ne’e ho tema “Direitu ba bee moos, maibé tenke tau-matan ba bee fo’er” ne’ebé hala’o iha Tibar, loron 24 fulan-marsu tinan 2017.
Primeiru-Ministru, iha nia intervensaun, hateten katak área bee no saneamentu hanesan área ne’ebé importante tebes, la’ós de’it mai Timor-Leste maibé ba mundu tomak. Na’i-ulun ne’e fó hanoin kona-ba importánsia husi bee moos no husi tau-matan be bee fo’er atu labele estraga meiu ambiente.
Tuir dadus husi Diresaun Nasionál Bee no Saneamentu (DNAS, sigla iha dalen portugés), iha média ema ida presiza bee litru 120 loron ida ba ninia nesesidade. Iha sorin seluk, rekursu bee nian iha Timor-Leste sufisiente maibé iha realidade populasaun barak maka seidauk hetan asesu ba bee moos. Primeiru-Ministru mós salienta tan katak problema seluk ne’ebé liga ho bee no saneamentu maka asesu bee mós ba uma kain sira ba kondisaun moris nian ne’ebé saudavel, sei mínimu. 
Atu hatán ba problema ida ne’e, tuir Xefe Ezekutivu, tenke iha polítika ne’ebé klaru, “Ita-nia rekursu ídriku sira sufisiente. Ita presiza dezenvolve mekanizmu atu investe barak liután no atu jere kaptasaun no distribuisaun bee nian hodi nune’e populasaun tomak bele hetan asesu. Aprovasaun polítika de’it la sufisiente. Polítika hanesan matadalan atu orienta ita maibé tenke iha planu implementasaun ne’ebé di’ak , tenke iha investimentu finanseiru atu nune’e polítika ne’e bele sai realidade”.
Aleinde ne’e, Rui Maria de Araújo mós ko’alia kona-ba aproveitamentu bee fo’er atu bele utiliza fila-fali ho referénsia ba sentru tratamentu bee fo’er iha Tibar ne’ebé prodús bee hamutuk litru rihun 170, ne’ebé bainhira fahe ba litru 120 kada loron ba ema ida, bele atende ema rihun resin, karik bele transforma bee ne’e husi bee ne’ebé fo’er ba bee ne’ebé bele uza fila-fali.
Primeiru-Ministru husu ba ekipa husi Diresaun Bee no Saneamentu nian atu haree ba kestaun importante relasiona ho koordenasaun intersetorál kona-ba manutensaun sistema be moos nian tanba maske kaptasaun furak no rede distribuisaun di’ak tebtebes, maibé bainhira manutensaun ba sistema la-funsiona loloos susar tebtebes atu iha sustentabilidade iha sistema ne’e.
Primeiru-Ministru apela mós ba populasaun tomak atu asume responsabilidade no kontribui ba polítika bee nian ne’ebé sei aprova, bele sai realidade, liuliu iha área prezervasaun ba bee-matan sira: “Ita hotu iha responsabilidade atu tau-matan ba bee-matan sira iha Timor laran tomak liuhusi labele sunu rai, kuda ai-oan no organiza malu atu halo manutensaun ba rede distribuisuan bee nian.”
Ba parseiru sira ne’ebé durante ne’e servisu hamutuk ho Governu, liuliu ho Diresaun Nasionál Bee no Sanementu, Primeiru-Ministru husu mós atu oinsá bele lori asesu bee moos ba populasaun barak liután iha Timor laran tomak.
Iha fatin hanesan Ministru Obras Publikas Transportes no Komunikasoins (MOPTK), Gastão de Sousa hateten, pasu importante ne’ebé mak ministériu hahú maka dezenvolve ona dokumentu tolu importante ba área bee no saneamentu maka Polítika Saneamentu ne’ebé hetan tiha ona aprovasaun husi Governu no Polítika Nasionál ba Jestaun Rekursu Idríku no mós Polítika Nasionál ba Abastesimentu Bee iha Timor-Leste, ne’ebé sei diskute iha Konsellu Ministrus no la kle’ur tan hetan apresiasaun no aprovasaun. Gastão de Sousa hateten: “Polítika hirak ne’e sei sai hanesan matadalan ba setór bee nian.”
Marka prezensa mós iha selebrasun ne’e maka Vise-Ministru MOPTK no lideransa Governu nian balun, DiretóNasionál sira, embaixadór Portugál nian ba Timor-Leste, parseiru dezenvolvimentu nian sira, lider komunitáriu sira husi Munisípu Likisá.
