Primeiru-Ministru lansa programa Parseria ba Dezenvolvimentu Umanu

Primeiru-Ministru, Dr. Rui Maria de Araújo, ho Embaixadór Austrália ba Timor-Leste, Sr. Peter Doyle nian, lansa ona programa Parseria ba Dezenvolvimentu Umanu iha loron 8 fulan-marsu tinan 2017, iha Timor Plaza, Dili.

Parseria ba Dezenvolvimentu Umanu ne’e maka programa integradu ida ne’ebé Governu Austrália no Governu Timor-Leste sei hala’o hamutuk, durante tinan 10, husi tinan 2016 to’o iha tinan 2026.

Xefe Governu ne’e hato’o agradesimentu ba Austrália kona-ba parseria ida ne’e, ne’ebé partilla ita-nia objertivu hodi harii no mantein populasaun ida ne’ebé saudavel, edukadu no prósperu. “Ami fiar iha potensialidade husi ami-nia povu, liuliu husi ami-nia foin-sa’e sira. Besik katoluk tolu husi ami-nia populasaun sira-nia otas menus husi tinan 25. Ami aproveita poténsia husi ami-nia foin-sa’e sira nian hodi lori nasaun ida ne’e ba oin no ami iha joven barbarak ho talentu no enerjia estraordináriu, ne´bé sei haforsa ita-nia dalan ba desenvolvimentu sustentavel no kreximentu ekonómiku,” hateten Primeiru-Ministru.

Rui Maria de Araújo mós hakarak atu timoroan hotu, feto, mane, foin-sa’e sira no ema sira ne’ebé moris ho defisiénsia, bele hetan benefísiu no iha biban atu hadi’a sira-nia moris no ba dezenvolvimentu nasaun nian.

Iha biban ida ne’e, Xefe Ezekutivu informa mós katak durante tinan rua ikus ne’e, Governu Konstitusionál VI hatudu ona ninia kompromisu hodi hatan ba nesesidade imediata nasaun nian, liuliu iha setór sosiál, bazeia ba programa Governu Konstitusionál V nian. 6W9A0320 300x200 Primeiru Ministru lansa programa Parseria ba Dezenvolvimentu Umanu

Embaixadór Austrália nian hateten katak nia nasaun Austrália iha kompromisu ida atu fó apoiu ba Timor-Leste iha ninia determinasaun atu investe iha emar sira. Embaixadór Peter Doyle hateten mós katak parseria dezenvolvimentu nian ne’ebé hala’o tiha ona, hatudu katak iha kooperasaun entre nasaun rua ne’e, serbisu konjuntu ida  hodi hatán ba nesesidade dezenvolvimentu umanu nian iha Timor-Leste.

Parseria ba Dezenvolvimentu Umanu fó apoiu ba programa integradu sira iha área sira saúde nian, igualdade jenéru, saneamentu, bee, protesaun sosiál, defisiénsia sira no nutrisaun nian.

Primeiru-Ministru,  felisita no agradese ba Governu no povu Austrália nian ba sira-nia esforsu hodi kontinua fó nafatin apoiu ba dezenvolvimentu Timor-Leste.

Hafoin lansamentu husi programa ne’e, Xefe Ezekutivu akompaña husi Vise-Ministra Edukasaun, Vise-Ministra Saúde, Embaixadór Austrália no konvidadu sira seluk  vizita espozisaun ida kona-ba dezenvolvimentu kooperasaun Timor-Leste nian no Austrália.

url: http://timor-leste.gov.tl?lang=tp&p=17550