Komisaun ba Reforma Leijizlativa kontinua halo diagnóstiku kona-ba sistema Justisa informál

Iha loron 5 fulan-marsu liubá, ekipa investigasaun nian husi Komisaun ba Reforma Lejizlativa no Reforma Setór Justisa nian (CRL, sigla iha lian portugés) no husi Centro de Estudos Sociais husi Universidade Coimbra (SES), ho partisipasaun husi Prezidente CRL, Jorge Graça, hasoru-malu ona atu haree kle’an liután asaun hirak ne’ebé tau ona iha programa ba realizasaun faze daruak husi diagnóstiku kona-ba sistema justisa informál.

Ekipa rua ne’e halo grella (kuadru) no kalendáriu entrevista nian, rezultadu ne’ebé hein husi investigasaun ida ne’e no organizasaun meiu no ekipa traballu nian sira. Sira mós hahú halo ona análize kona-ba estrutura husi relatóriu finál traballu ida ne’e nian. Iha faze ida ne’e, sei fó kontinuasaun ba faze dahuluk diagnóstiku nian kona-ba meiu estrajudisiál nian sira kona-ba rezolusaun disputa nian, liuhusi konsulta ho instituisaun sira husi setór justisa no entidade administrativa husi lokál sira, komunitária no tradisionál nian sira.

Aprezentasaun no debate kona-ba rezultadu sira husi diagnóstiku no relatóriu ikus nian prevee ona ba fulan-jullu oinmai. Ba hirak ne’e, Komisaun sei organiza konferénsia ida, ne’ebé nakloke ba públiku, hein katak sei iha partisipasaun ne’ebé maka boot liután.

Durante loron 6 no loron 7 fulan-marsu, ekipa investigadora sira nian partisipa iha asaun formasaun nian ida kona-ba téknika sira entrevista nian no elaborasaun temátika sira ne’ebé atu aborda iha terrenu.

Serbisu iha kampu hahú ona iha loron 8 fulan-marsu iha Munisípiu Baukau nian, tuirmai sei hala’o iha Munisípiu Vikeke no Munisípiu Lospalus.

Tanba ne’e, hein katak diagnóstiku ne’e sei bele kontribui maka’as ba formulasaun polítika, ajenda no programa ida ba reforma lejizlativa no reforma setór justisa  nian iha área ida ne’e .

url: http://timor-leste.gov.tl?lang=tp&p=17532