Sorumutuk Konsellu Ministru loron 24 fulan-fevereiru tinan 2017
Prezidénsia Konsellu Ministrus
VI Governu Konstitusionál
..............................................................................................................................
Díli, loron 24 fulan-fevereiru tinan 2017
Komunikadu Imprensa
Sorumutuk Konsellu Ministrus nian iha loron 24 fulan-fevereiru tinan 2017
Konsellu Ministrus hala’o sorumutuk iha loron-sesta ne’e, iha Palásiu Governu, iha Dili, no Ministru Estadu, Koordenadór Asuntu Administrasaun Estadu no Justisa no Ministru Administrasaun Estatál ninia dekretu Governu nian kona-ba prosedimentu tékniku sira atu hala’o eleisaun prezidénsiál no parlamentár sira iha rai-li’ur hetan ona aprovasaun, ho objetivu atu garante prosesu votasaun nian no kontajen votu sira, no mós apuramentu rezultadu eleitorál sira rai-li’ur nian ba eleisaun Prezidente Repúblika. Hetan ona mós aprovasaun, husi dekretu Governu ne’ebé regula realizasaun kampaña eleitorál, ho durasaun loron 15 no remata loron rua molok tama ba loron eleisaun nian;dekretu Governu ne’e mós regula kona-ba realizasaun atividade observasaun eleitorál nian, ne’ebé hala’o husi ema singulár sira, reprezenta husi organizasaun nasionál ka internasionál.
Dekretu Governu nian ne’ebé regula organizasaun no funsionamentu husi sentru votasaun no estasaun votu nian sira no ida ne’ebé regula realizasaun prosedimentu votasaun nian sira, kontajen votu no apuramentu ba rezultadu sira hetan ona mós aprovasaun.
Atubele garante kumprimentu ba justisa eleitorál nian, maka halo ona aprovasaun ba dekretu Governu nian kona-ba realizasaun fiskalizasaun ba prosesu eleitorál, nune’e mós dekretu kona-ba atividade kobertura jornalístika sira ba prosesu eleitorál nian. Atu apoia direitu ba votu sidadaun hotu-hotu nian, maka aprova ona dekretu Governu nian kona-ba prosesu votasaun nian iha ospitál no prizaun sira.
Ikusliu, Konsellu Ministrus aprova ona dekretu Governu nian kona-ba prezensa exepsionál husi forsa PNTL nian sira iha sentru votasaun, atu halo seguransa ba ema hotu ne’ebé partisipa iha prosesu eleitorál.
