Primeiru-Ministru hala’o vizita ofisiál ba Nova Zelándia (Zelándia Foun)
Ministru Estadu no Prezidénsia Konsellu Ministru no
Portavós ofisiál Governu Timor-Leste
Dili, loron 24 fulan-fevereiru tinan 2017
Primeiru-Ministru hala’o vizita ofisiál ba Nova Zelándia (Zelándia Foun)
Primeiru Ministru, Rui Maria de Araújo, arranka husi Dili hodi hala’o vizita ofisiál ida ba Zelándia Foun, iha loron 25 fulan-fevereiru no sei fila hikas iha loron 4 fulan-marsu. Primeiru-Ministru timoroan ne’e sei hala’o sorumutuk bilaterál sira ho ninia omólogu neozelandés, Bill English. Halo parte iha delegasaun ne’e maka Primeiru-Ministru nia espoza, Teresa Madeira Soares, Ministru Negósius Estranjeirus no Kooperasaun, Hernâni Coelho, Ministru Interiór, Longuinhos Monteiro, no Segundu Komandante-Jerál Polísia Nasionál Timor-Leste nian, Faustino da Costa.
Hala’o vizita ida ne’e hodi hatan ba konvite ida hosi Governu Zelándia Foun nian, atu vizita sidade sira Auckland, Wellington no Dunedin. Iha programa atividade nian sira ne’e inklui han-kalan negósiu nian ida iha Auckland ho objetivu atu fó koñese ba partisipante sira kona-ba dezenvolvimentu territóriu timoroan nian no insentiva empreza sira husi Zelándia Foun hodibele mai investe iha Timor-Leste.
Delegasaun Timor nian ne’e sei halo diálogu ho instituisaun sira ne’ebé mak iha esperiénsia barak ona. Instituisaun sira ne’e maka hanesan Shaw Dairy Farm (indústria susu-ben), ne’ebé lokaliza iha Auckland, no Royal Albatross Centre, iha rai-dilan (península) Otago (Dunedin) nian, modelu ida ne’ebé iha susesu di’ak iha área ekoturizmu nian.Troka esperiénsia ida ne’e hodi buka tulun ba Timor-Leste atubele ba fali ekonomia ida ne’ebé diversifikada liután.
Universidade Teknolojia Auckland no Universidade Otago nian, iha Dunedin mós sei simu delegasaun timoroan nian ne’e, iha biban ida ne’ebé bele hasoru-malu ho estudante timoroan sira.
Zelándia Foun kontribui maka’as ona iha área defeza no seguransa nian durante restaurasaun independénsia, tanba ne’e maka Primeiru-Ministru sei hala’o vizita ida ba Akademia Polisía nian, iha Wellington. Evolusaun husi relasaun entre nasaun rua ne’e, haree liu ba dezenvolvimentu ekonómiku, liuliu iha setór privadu, edukasaun no formasaun, seguransa no justisa. Ministru Negósius Estranjeirus Zelándia Foun nian, Murray McCully MP, vizita ona Timor-Leste iha tinan 2012 no tinan 2014 no Embaixada Timor-Leste nian iha Zelándia Foun, hetan inaugurasaun iha sidade Wellington, iha tinan 2014
Portavós, Ministru Estadu Agio Pereira, observa katak “Timor-Leste simu ho di’ak biban ida ne’e atu insentiva parseria komersiál no sorumutuk ho peritu sira husi Zelándia Foun nian iha área sira ne’ebé iha importánsia boot ba ninia diversifikasaun ekonómika. Viajen Primeiru-Ministru nian ida ne’e sei hametin liután relasaun di’ak ne’ebé iha tiha ona entre nasaun rua ne’e, ne’ebé maihusi amizade no kooperasaun” REMATA
