Iha kontinuasaun husi prosesu konsiliasaun obrigatória ne’ebé hala’o hela husi país rua ne’e, ohin, loron 24 fulan-janeiru, fó-sai komunikadu konjuntu trilaterál ida (versaun Tétun) – husi país rua ne’e no Komisaun Konsiliasaun – kona-ba lala’ok husi sorumutuk sira ne’ebé realiza ona husi loron 16 to’o loron 20 fulan-janeiru, iha Singapura.

Iha loron hirak ne’e nia laran, Komisaun hala’o sorumutuk ho Timor-Leste no Austrália “atu analiza sira-nia pozisaun negosiasaun nian sira kona-ba, sira-nia ketan tasik iha Tasi Timor ne’e atu hatuur loloos iha ne’ebé, atu nuene’e bele identifika área sira ne’ebé nasaun rua ne’e bele konkorda, hodibele diskute hamutuk iha sorumutuk sira tuirmai”. To’o ikus, reprezentante sira husi país rua ne’e konkorda katak sorumutuk sira ne’ebé hala’o ona ne’e produtivu no país rua ne’e promete atu mantein sira-nia kompromisu ne’ebé sira manifesta ona, to’o hakotu prosesu konsiliasaun nian, iha fulan-setembru tinan 2017.

Iha loron 10 fulan-janeiru liubá, Governu Timor-Leste haruka ona notifikasaun ida ba Governu Austrália nian, iha ne’ebé afirma intensaun atu hapara Tratadu kona-ba Ajuste Tasik nian Balun iha Tasi Timor, ne’ebé asina iha tinan 2006.  Notifikasaun ne’e iha prazu fulan-tolu (loron 10 fulan abril 2017).

Atu lee testu kompletu husi komunikadu orijinál nian, klike iha ne’e.