Governu Timor-Leste

Munisípiu Aileu sai nu’udar Munisípiu dahuluk ne’ebé remata ona ho susesu rejistu kona-ba pasiente sira, atu tuirmai bele hatama dadus sira iha sistema dijitál husi programa “Saúde iha Família”. Primeiru-Ministru, Rui Maria de Araújo, akompaña husi Vise-Ministra Saúde, Ana Isabel Soares, dezloka iha loron 17 fulan-dezembru, ba Postu Administrativu Laulara, Munisípiu Aileu, hodi  marka faktu ne’e.

Xefe Ezekutivu felisita populasaun, Delegadu Saúde sira no ekipa sira seluk ba rejistu ne’ebé sira halo ona ba família hamutuk 7.573, hodi dehan katak rezultadu ida ne’e bele hetan maske iha difikuldade barak. Rui Maria de Araújo agradese ba apoiu ne’ebé parseiru dezenvolvimentu nian sira fó ona no husu atu sira kontinua fó nafatin apoiu ne’e.

Programa ida ne’e, tuir Na’i-ulun ne’e esplika, kria ho inisiativa Governu nian “ho hanaoin atu reforsa kuidadu primáriu saúde nian sira, liuliu iha família sira”.

Primeiru-Ministru dezafia munisípiu sira seluk atu tuir ezemplu Aileu nian, hodi husu ba sira atu remata sira-nia rejistu iha sira-nia fatin iha loron 20 fulan-maiu tinan 2017.

 “Bainhira ita hakarak, maka ita bele. Futuru Timor-Leste nian sei nabilan karik ita-nia atensaun iha saúde familiár realiza ho vontade no dedikasaun”, Primeiru-Ministru manifesta.

Nu’udar rezultadu husi buat ne’ebé maka halo ona, Munisípiu Aileu simu komputadór 25 hosi Gabinete Primeiru-Ministru nian. Lori populasaun nia naran, Administradór Munisípiu Aileu nian, afirma ninia kompromisu atu asegura nafatin kontinuidade husi uzu sistema dijitál nian ne’e.

Marka prezensa iha eventu ne’e, reprezentante sira hosi Organizasaun Mundiál Saúde no husi Kooperasaun Kubana, diretór no xefe sira husi Servisu Ministériu Saúde nian, profisionál saúde nian sira, xefe Suku sira no populasaun lokál.