Timor-Leste ho estatutu observadór iha Organizasaun Mundiál Komérsiu nian

Planu Governu Timor-Leste nian atu sai membru ida ho direitu tomak husi Organizasaun Mundiál Komérsiu nian (OMK) fó tán pasu ida, ho anúnsiu husi Konsellu Jerál Organizasaun ne’e nian atu fó estatutu hanesan observadór ba ita-nia rain no atu kria grupu traballu ida hodi halo negosiasaun kona-ba kondisaun sira ba adezaun ne’e.

Anúnsiu ne’e fó sai iha sorumutuk ida ne’ebé órgaun ne’e hala’o iha Jenebra (Suísa) iha loron 7 fulan-dezembru. OMK prodús ona komunikadu imprensa ida ne’ebé deskreve kona-ba evolusaun husi pedidu Timor-Leste nian.

Ministru Estadu, Koordenadór Asuntu Ekonómiku no Ministru Agrikultura no Peskas, Estanislau da Silva, afirma ona iha sorumutuk ne’e katak “adezaun ba OMK sai ona nu’udar objetivu boot ida husi Governu, kona-ba konstrusaun institusionál no polítika ekonómika rai-li’ur Governu Timor-Leste nian”. Asaun ida ne’e halo parte iha Programa Governu nian, ho hanoin atu aselera kreximentu ekonomia nian no apoia diversifikasaun ekonómika. (Ministru ne’e hetan entrevista husi OMK – haree ninia vídeo iha ne’e.)

ASEAN defende adezaun Timor-Leste nian ba OMK no, iha deklarasaun públika, rekoñese kompromisu “Timor-Leste nian ho prosesu adezaun ba OMK no ninia esforsu sira atu halo reforma ekonómika no sosiál sira ba objetivu ida ne’e”. Deklarasaun ne’e afirma katak “ASEAN insentiva membru sira hotu atu fó tulun ba Timor-Leste iha prosesu adezaun no iha integrasaun iha sistema komérsiu multilaterál nian ida”.

Portavóz Governu nian fó-sai komunikadu imprensa ida kona-ba evolusaun husi prosesu adezaun ba OMK no hateten katak Governu “Hakarak atu halo negosiasaun kona-ba ninia adezaun ba Organizasaun Mundiál Komérsiu nian, ho hanoin atu fasilita esportasaun produtu lokál sira, fó protesaun kontra prátika komersiál sira ne’ebé diskriminatória, hadi’a asesu ba merkadu rai-li’ur nian no loke oportunidade foun sira ba investimentu”.

url: http://timor-leste.gov.tl?lang=tp&p=16969