Lei Orsamentu Jerál Estadu tinan 2017 nian sai husi Parlamentu Nasionál ho aprovasaun iha lian ida de’it
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, Loron 9 fulan-dezembru tinan 2016
Lei Orsamentu Jerál Estadu tinan 2017 nian sai husi Parlamentu Nasionál ho aprovasaun iha lian ida de’it
Iha loron 9 fulan-dezembru, Orsamentu Jerál Estadu nian ba tinan 2017, ne’ebé Governu Konstitusionál VI aprezenta ona, pasa iha Parlamentu Nasionál ho votu afavór hamutuk 60, laiha ida maka kontra no laiha abstensaun. Orsamentu ne’ebé hetan aprovasaun ne’e ninia montante totál maka dolar amerikanu millaun 1.386, 826, ne’ebé fahe liuliu ba kategoria sira hanesan Vensimentu no Saláriu, hamutuk dolar millaun 209,701, Beins no Servisu hamutuk dolar millaun 395,047, Transferénsia Públika, hamutuk dolar millaun 420,964, Kapitál Menór hamutuk dolar millaun 12,075, no Kapitál Dezenvolvimentu (inklui Fundu Infraestrutura no Empréstimu), hamutuk dolar millaun 394, 039.
Votasaun liu hotu tiha, Primeiru-Ministru, Rui Maria de Araújo, agradese ba deputadu sira hotu ba “debate kona-ba Orsamentu Jerál Estadu nian ba tinan 2017 ne’ebé hala’o ho dalan demokrátika no konstrutiva“ no observa katak ba Governu votasaun iha lian ida de’it ne’e “reprezenta votu konfiansa hanesan ita bo’ot sira teme ona votu ida ne’ebé VI Governu sei buka atu honra hodi serbisu ho empeñu bo’o liu-tan ba Povu no Nasaun to’o ninia mandatu remata”.
Proposta inisiál Orsamentu ne’e nian ne’ebé Governu aprezenta ona hetan tiha ona apresiasaun iha jeneralidade no hetan aprovasaun ho lian ida de’it iha loron 25 fulan-novembru. Hafoin sesaun pergunta no debate nian sira kona-ba kestaun oioin, deputadu sira aprezenta proposta alterasaun nian kurakuran 80 ne’ebé maka hetan ona konsiderasaun husi Komisaun Eventuál ba Rekolla no Análize kona-ba Proposta Alterasaun Konsensuál sira ba Proposta Lei, ne’ebé Parlamentu Nasionál harii. Primeiru-Ministru haree katak desizaun hodi harii Komisaun ne’e loke dalan ba diskusaun ida ne’ebé “nakloke no demokrátika” no adosaun ba alterasaun hirak ne’ebé propoin ona “sein kompromete limite másimu ne’ebé mak estabelese ona iha inísiu no la kontraria kompromisu Governu nian kona-ba implementasaun projetu, programa no atividade sira ne’ebé propoin ona ba tinan 2017”.
Molok votasaun ikus iha loron 9 fulan-dezembru, Orsamentu ne’e liuhusi debate iha plenáriu no hetan votasaun iha espesialidade, ho análize ba artigu ida-idak husi projetu Lei ne’e. Lei Orsamentu Jerál Estadu nian ba tinan 2017 oras ne’e daudaun sei apresenta ba Prezidente Repúblika, Taur Matan Ruak, atubele hetan promulgasaun.
Atu remata sesaun ikus iha Parlamentu Nasionál, Primeiru-Ministru hateten fila-fali “kompromisu atu lori-ba to’o rohan kompromisu ne’ ebé hala’o ona ba ninia mandatu” hodi permite “dinamiza ekonomia la’ ós-petrolífera no aumenta sustentabilidade ba ita nia projetu desenvolvimento.”REMATA
