Governu hato’o ninia kondelénsia ba Fidel Castro, Timor-Leste nia belun boot, ninia mate

Ho laran susar tebes maka Timor-Leste simu notísia kona-ba lider revolusionáriu ne’e nia mate, ho idade tinan 90 nian, iha loron 26 fulan-novembru tinan 2016.

Governu Timor-Leste, hodi povu timoroan nia naran, hato’o kondolénsia ba Prezidenti Raúl Castro no manisfesta ninia solidadriedade ba povu kubanu.

Fidel Castro hanesan iis-kbiit (inspirasaun) ida ba timoroan hotu durante luta ba autodeterminasaun no nu’udar apoiante ativu ida ba dezenvolvimentu Timor-Leste nian hafoin restaurasaun independénsia. Iha tinan 2010, simu Kolar Boot husi Orden Timor-Leste nian,  ba tulun ne’ebé ninia país fó iha área saúde no edukasaun nian. Distinsaun ne’ebé entrega iha Havana ne’e, husi José Ramus Horta no Raúl Castro maka simu, hodi nia maun boot nia naran.

Husi sorumutuk ida iha Malázia, iha fulan-fevereiru tinan 2003, iha ne’ebé, Kay Rala Xanana Gusmão, José Ramos Horta, Mari Alkatiri no Komandante Fidel Castro sira partisipa, maka hahú kooperasaun institusionál ida,  ho karáter ida respeita malu nian, amizade no vontade di’ak.

Timor-Leste hato’o ninia rekoñesimentu ba Fidel Castro no ba povu kubanu tanba brigada profisionál sira saúde nian ne’ebé serbisu iha Timor-Leste, tanba bolsa estudu 1.000 ne’ebé fó ona ba foin-sa’e timoroan sira atu estuda iha área Medisina nian iha Kuba, tanba asisténsia téknika iha halakon analfabetizmu no tanba parseria sira iha área desportu nian.

Iha tinan 2015, Primeiru-Ministru, Rui Maria de Araújo, hala’o vizita ba Kuba no hetan biban hodi hato’o ninia rekoñesimentu no solidadriedade ba Prezidente Raúl Castro. Antigu Primeiru-Ministru, Xanana Gusmão, fó hanoin hikas fali katak Komandante-ein-Xefe Fidel Castro hanesan belun di’ak no respeitadu.

Iha momentu triste nian ida ne’e, Governu hanoin hikasfali knaar Komandante-ein-Xefe Fidel Castro nian no ninia amizade ne’ebé boot ho Timor-Leste. REMATA