Orsamentu Jerál Estadu nian ba 2017 aprova ona iha jeneralidade ho unanimidade
Ministru Estadu no Prezidénsia Konsellu Ministru no
Portavós Ofisiál Governu Timor-Leste
Dili, Loron 26 fulan-novembru tinan 2016
Orsamentu Jerál Estadu nian ba 2017 aprova ona iha jeneralidade ho unanimidade
Proposta kona-ba Orsamentu Jerál Estadu nian ba tinan 2017 aprova tiha ona husi Parlamentu Nasionál iha jeneralidade, iha loron 25 fulan-novembru kalan, ho votu afavór hamutuk neenulu-resin-rua, no laiha votu kontra no abstensaun.
Agora Parlamentu sei ba konsidera fali orsamentu ne’e iha espesialidade no diskute hodi vota ba artigu ida-idak hosi projetu lei ne’e molok halo votasaun finál globál, ne’ebé sei hala’o iha loron 14 fulan-dezembru nian.
Iha ninia diskursu maktakak plenária loron tolu ne’e nian, Ministru Estadu Agiu Pereira agradese ba membru Parlamentu Nasionál ba “debate iha jeneralidade ne’ebé la’o ho forma demokrátika no konstrutiva”, hodi dehan katak “komentáriu, sujestaun no krítika sira ne’ebé konstrutivu hariku debate ne’e no sei kontribui ba implementasaun ida ne’ebé di’ak liu husi Orsamentu ne’e, ne’ebé maka la’ós Governu nian, la’ós Parlamentu nian, maibé timoroan tomak nian no ba timoroan tomak.
Durante debate iha plenária, Komisaun-C husi Parlamentu Nasionál, ne’ebé simu knaar atu analiza finansa públika sira, hato’o ona ninia relatóriu. Hafoin sesaun pergunta no debate kona-ba kestaun sira ne’ebé maka mosu, deputadu sira aprezenta alterasaun balun ba lei ne’e, ne’ebé maka oras ne’e daudaun Komisaun Eventuál ba Rekolla no Análize Proposta Alterasaun sira ba Projetu Lei ne’e organiza hela.
Iha debate ne’e, Governu afirma fila-fali katak orsamentu ne’e projetadu atubele permite Governu hodi kontinua serbisu ba diversifikasaun ekonomia nian, hodi reforsa infraestrutura sira ne’ebé esensiál ba kreximentu tempu naruk nian. Proposta sira husi Governu ne’ebé reflete iha Orsamentu ne’e buka apoia kriasaun kondisaun sira atu halais atividade setór privadu nian no dada investimentu husi empreza sira.
Iha sesaun taka debate ne’e nian, Ministru Agio Pereira hateten katak “kompromisu Governu Konstitusionál VI nian mak ezekuta orsamentu ne’ebé ohin ami submete ba atu hetan konsiderasaun husi distintu Deputadu sira ne’e, ho sentidu responsabilidade nian tomak iha implementasaun husi projetu no programa sira ne’ebé kontribui ba dezenvolvimentu sustentavel país nian no atu hadi’a ita-nia sidadaun sira-nia kualidade moris”. REMATA
