Parlamento Nasionál aprova OJE ba 2017 iha jeneralidade

Ses. 25 novembru 2016, 19:35h
9K9A5505

Parlamentu Nasionál (PN) aprova ona ohin, loron 25, fulan-novembru, tinan 2016, Orsamentu Jerál Estadu (OJE) ba tinan 2017 iha jeneralidade, ho vote favor 62, kontra zeru no abstensaun zeru. Tuir mai diskusaun no votasaun iha espesialidade ne’ebé, tuir Rejimentu Parlamentu Nasionál nian, labele liu loron 10, no sei hahú loron 30 fulan-novembru.

To’o iha loron 14 fulan-dezembru, Komisaun Eventuál  Rekolla no Análize  Proposta Konsensuál nian  ba Proposta Lei, sei apresia proposta sira alterasaun  nian atu aprezenta ba plenáriu, nune’e mós testu úniku substitutivu nian ( ho proposta sira ne’ebé mak aprova ona), ne’ebé sei vota hafoin halo tiha diskusaun husi membru  Parlamentu sira. Testu ne’ebé aprova tiha ona  sei tau hamutuk ba-iha proposta lei nian.

Hafoin konkluzaun diskusaun nian no votasaun hosi artigu hotu-hotu proposta lei nian, sei hala’o fali votasaun finál globál testu nian ho alterasaun sira ne’ebé aprova ona. Dokumentu finál, Lei Orsamentu Jerál Estadu nian ba tinan 2017, sei haruka ba Prezidente Repúblika, atu halo promulgasaun.

   Ba leten