Governu Timor-Leste

Ho kolaborasaun finanseira husi Unidade ba Apoiu Sosiedade Sivíl husi Gabinete Primeiru-Ministru nian, Konventu foun Irmán Clarissa sira nian iha Maliana, hetan ona inaugurasaun iha loron 21 fulan-setembru. Iha Finansiamentu konstrusaun ne'e nian Governu Portugál nian mós partisipa no reflete rekoñesimentu ba knaar importante husi relijioza sira ne’e iha nivel komunidade nian, iha área sira edukasaun nian no mós kuidadu primáriu saúde nian sira, aleinde  atividade pastorál nian ne’ebé Orden ne’e hala’o.

Bispu Maliana nian, D. Norberto do Amaral, hahú atividade ba instalasaun Irmán Clarissa sira nian iha parókia Tunubibi iha tinan 2012. Dioseze no populasaun lokál maka fó rai no konstrusaun Mosteiru ne’e nian hahú iha tinan 2014.

Tanba ne’e, ho orgullu boot maka D. Norberto do Amaral prezide serimónia inaugurasaun ne’e nian, iha ne’ebé marka prezensa Embaixadór Portugál nian, Manuel Gonçalves de Jesus, Koordenadór Unidade ba Apoiu Sosiedade Sivíl GPM nain, Joaquim Freitas, Administradór Munisípio Bobonaru, Xefe Postu Administrativu Maliana, Xefe Aldeia sira, orden relijioza oioin sira no elementu barak husi populasaun sira.