Governu Timor-Leste

Primeiru-Ministru, Rui Maria de Araújo, hala’o enkontru ho Ministériu Edukasaun no Reitór sira husi Universidade sira iha Timor-Leste, iha loron 17 fulan-novembru tinan 2016, iha Ministériu Edukasaun, iha Vilaverde, Dili.

Timor-Leste iha Universidade lubuk boot ida kompostu husi Universidade Públika 1, Institutu Politékniku 1 ne’ebé Governu foin harii, no Universidade no Institutu privadu hamutuk 10 ne’ebé hetan ona akreditasaun. Tanba ne’e iha prespetiva Governu nian presiza halo enkontru regulár ho Reitór sira hodi haree dezenvolvimentu husi Ensinu Superiór sira iha Timor-Leste, no dezafiu saida de’it maka sira hasoru, tantu iha nivel públiku no mós privadu.

Primeru-Ministru hateten katak enkontru ida ne’e hanesan enkontru inisiál ida, no  rejista preokupasaun lubuk boot ida husi reitór sira. Kestaun dahuluk, Reitór UNPAZ nian levanta, maka kria forum ida atu Ministériu Edukasaun no reitór sira bele hasoru malu regularmente kada fulan neen, ne’ebé Xefe Ezekutivu nia mós konkorda. Rezolusaun ida fali maka foti loron 17 fulan-novembru nian sai hanesan Loron Nasionál Ensinu Superiór nian.

Reitór sira ne’ebé hola parte iha enkontru ida ne’e sente orgullu tanba iha oportunidade hodi hala’o enkontru formál ho Xefe Governu hodi hato’o sira nia prekupasaun no sira iha esperansa atu enkontru ida ne’e bele kontinua nafatin iha futuru. 

Partisipa iha enkontru ne’e maka Ministru Estadu, Koordenadór Asuntu Sosiál no Ministru Edukasaun, António da Conceição, Vise-Ministra Edukasaun I, Dulce Jesus Soares; Vise-Ministru Edukasaun II, Abel da Costa Ximenes, Reitór sira husi Universidade sira iha Timor-Leste, Diretór Ezekutivu husi Agência Nacional para a Avaliação e Acreditação Academica (ANAAA) no Diretór no mós Xefe Departamentu sira husi Ministériu Edukasaun.